پاکستان اسٹاک ایکسچینج میں شاندار تیزی، انڈیکس میں 7241 پوائنٹس کا اضافہ

کراچی: پاکستان اسٹاک ایکسچینج (پی ایس ایکس) میں کاروباری ہفتے کے دوران تاریخ ساز اور طاقتور ریباؤنڈ دیکھا گیا جہاں سرمایہ کاروں کی بھرپور دلچسپی کے باعث مارکیٹ میں زبردست تیزی ریکارڈ کی گئی۔ ملک میں سیاسی اور جغرافیائی کشیدگی میں کمی کے مثبت اشاروں اور اسٹیٹ بینک آف پاکستان کی جانب سے شرح سود کو برقرار رکھنے کے فیصلوں نے سرمایہ کاروں کے حوصلے بلند کر دیے۔ اس صورتحال کے نتیجے میں مارکیٹ کے کے ایس ای 100 انڈیکس میں 7,241 پوائنٹس کا نمایاں اضافہ ریکارڈ کیا گیا جس سے انڈیکس 4 فیصد سے زائد اوپر چلا گیا۔ ماہرین کے مطابق ٹریڈنگ کے آغاز ہی سے مارکیٹ میں خریداروں کی جانب سے گہری دلچسپی دکھائی گئی اور مختلف سیکٹرز میں وسیع پیمانے پر خریداری کا رجحان رہا۔ بینکنگ، انرجی اور سیمنٹ سمیت تمام اہم سیکٹرز میں حصص کی قیمتوں میں زبردست تیزی دیکھی گئی جس نے مارکیٹ کو بلندی کی نئی سطح پر پہنچا دیا۔ کاروباری تجزیہ کاروں کا کہنا ہے کہ حالیہ مہینوں میں مارکیٹ کو کئی چیلنجز کا سامنا تھا تاہم اب خطے میں کشیدگی کم ہونے اور معاشی اعشاریوں میں بہتری کی امیدوں نے اسٹاک مارکیٹ کو دوبارہ پٹری پر لے آنے میں اہم کردار ادا کیا ہے۔ اس شاندار تیزی سے سرمایہ کاروں کے اربوں روپے کے اثاثوں کی مالیت میں اضافہ ہوا ہے اور کاروباری حلقوں میں ایک بار پھر امید کی کرن جاگی ہے کہ آنے والے دنوں میں معاشی بحالی کا یہ سفر مزید تیزی سے آگے بڑھے گا۔