محسن نقوی کا دورہ ایران: دوطرفہ تعلقات اور علاقائی امن پر اہم مذاکرات

دفتر خارجہ کے ترجمان طاہر اندرابی نے بدھ کو ہفتہ وار پریس بریفنگ کے دوران بتایا کہ وزیر داخلہ محسن نقوی کا تہران کا دورہ دونوں برادر ممالک کے درمیان دوطرفہ تعلقات، سیکیورٹی کے امور اور علاقائی پیش رفت پر بات چیت کرنے کے لیے ہے۔ ترجمان کے مطابق یہ دورہ دونوں ملکوں کو باہمی دلچسپی کے امور پر تفصیلی تبادلہ خیال کا موقع فراہم کرتا ہے جس میں خطے میں امن، استحکام اور تعمیری مصالححت پر خصوصی توجہ دی جا رہی ہے۔ محسن نقوی جو منگل کے روز تہران پہنچے تھے، وہاں کے اعلیٰ حکام سے اہم ملاقاتیں کر رہے ہیں۔ تہران پہنچنے پر ایرانی ہم منصب اسکندر مومنی نے ان کا استقبال کیا، جبکہ بعد میں انہوں نے ایرانی وزیر خارجہ اور صدر مسعود پزشکیان سے بھی ملاقاتیں کیں۔ سفارتی ذرائع کے مطابق محسن نقوی کے اس دورے کا بنیادی مقصد اسلام آباد میمورنڈم آف انڈروسٹینڈنگ اور امریکہ اور ایران کے درمیان پاکستان کی ثالثی کی کوششوں کا جائزہ لینا ہے۔ پاکستان کی جانب سے امریکہ اور ایران کے درمیان تناؤ کم کرنے کی کوششوں پر بات کرتے ہوئے ترجمان نے اس بات کا اعادہ کیا کہ پاکستان برادر ممالک کے ساتھ مل کر بحران کے حل کے لیے مخلصانہ کوششیں جاری رکھے ہوئے ہے۔ پاکستان دونوں فریقین کو مذاکراتی میز پر لانے کے لیے بھرپور کوششیں کر رہا ہے تاکہ خطے میں پائیدار امن کی راہ ہموار کی جا سکے۔ پریس بریفنگ کے دوران دفتر خارجہ کے ترجمان نے گزشتہ ہفتے پاکستان، سعودی عرب اور ترکیہ کے درمیان دستخط ہونے والے دفاعی معاہدے کا بھی ذکر کیا جسے ہفتے کی سب سے اہم پیش رفت قرار دیا گیا۔ مکہ مکرمہ میں جمعہ کے روز طے پانے والے اس مشترکہ دفاعی معاہدے کا مقصد اجتماعی ڈیٹرنس کو مضبوط بنانا ہے اور اس کے تحت کسی ایک رکن ملک پر حملہ تمام ممبران پر حملہ تصور ہوگا۔ ترجمان نے واضح کیا کہ یہ معاہدہ خالصتاً دفاعی نوعیت کا ہے اور اس کا مقصد رکن ریاستوں کو درپیش سیکیورٹی چیلنجز کا مشترکہ طور پر مقابلہ کرنا ہے۔