اینٹراپک کا کلاڈ چیٹ بوٹ کے لیے اے آئی واٹر مارکس کا اعلان

امریکی مصنوعی ذہانت کی معروف کمپنی اینٹراپک (Anthropic) نے اعلان کیا ہے کہ وہ یورپی یونین کے ضوابط کی تعمیل کے لیے اپنے مشہور چیٹ بوٹ 'کلاڈ' (Claude) کے ذریعے تیار کردہ تحریروں میں ایک غیر مرئی یا پوشیدہ واٹر مارک شامل کرے گی۔ سین فرانسسکو میں پیر کے روز سامنے آنے والے اس نئے فیچر کا مقصد مصنوعی ذہانت سے تیار کردہ مواد کو شناخت کے قابل بنانا اور یورپی یونین کے سخت قوانین پر پورا اترنا ہے۔ کمپنی کے مطابق یہ واٹر مارک انسانوں کو دکھائی نہیں دے گا اور تحریر کو کاپی پیسٹ کرنے کے باوجود اپنی جگہ برقرار رہے گا۔ تاہم، اینٹراپک نے اس ٹول کی کچھ تکنیکی حدود اور پابندیوں کا بھی اعتراف کیا ہے۔ کمپنی کا کہنا ہے کہ واٹر مارک کی موجودگی کا مطلب صرف یہ ہے کہ اس تحریر کو پراسیس کرنے میں کلاڈ کی مدد لی گئی تھی، لیکن یہ اس بات کی قطعی ضمانت نہیں ہے کہ سارا مواد اسی چیٹ بوٹ نے تخلیق کیا ہے۔ مثال کے طور پر لوگ اکثر کلاڈ کو پروف ریڈنگ، ترجمہ کرنے، خلاصہ لکھنے یا فائلیں تبدیل کرنے کے لیے استعمال کرتے ہیں۔ لہذا، بنیادی خیالات اور ڈیٹا کسی اور ذریعے کا ہو سکتا ہے لیکن آؤٹ پٹ پر کلاڈ کا واٹر مارک موجود ہو سکتا ہے۔ اس کے برعکس، بہت مختصر یا زیادہ ایڈٹ کی گئی تحریروں میں یہ واٹر مارک ظاہر نہیں بھی ہو گا۔ نئے قوانین کے تحت، دو اگست یا اس کے بعد لانچ کیے جانے والے تمام کلاڈ ماڈلز میں یہ واٹر مارکس شامل ہوں گے جبکہ پرانے ماڈلز کو بھی اپ ڈیٹ کیا جائے گا۔ ان تبدیلیوں کا مقصد یورپی یونین کے ان قوانین کی پاسداری کرنا ہے جن میں اے آئی کے ذریعے تیار کردہ مواد پر مشین کے ذریعے پڑھے جانے والے نشانات کا ہونا لازمی قرار دیا گیا ہے، بصورت دیگر بھاری جرمانے عائد ہو سکتے ہیں۔ اینٹراپک نے واضح کیا ہے کہ وہ ان واٹر مارکس کا اطلاق دنیا بھر میں کرے گا، نہ کہ صرف یورپی مارکیٹ تک محدود رہے گا۔ یاد رہے کہ اینٹراپک ان لگ بھگ 190 تنظیموں میں شامل ہے جنہوں نے گزشتہ ماہ یورپی یونین کے اچھے طریقوں کے ضابطے پر دستخط کیے ہیں، جن میں گوگل، میٹا، مائیکروسافٹ اور اوپن اے آئی جیسی بڑی کمپنیاں بھی شامل ہیں۔ گوگل پہلے ہی 'سنتھ آئی ڈی' (SynthID) کے نام سے ڈیجیٹل واٹر مارکنگ ٹیکنالوجی متعارف کرا چکا ہے اور اسے انڈسٹری کا معیار بنانے کی کوشش کر رہا ہے۔ تاہم، یورپی ضابطے کے تقاضوں کے باوجود اینٹراپک نے تحال واٹر مارک کا کوئی مخصوص ڈیٹیکشن ٹول جاری نہیں کیا ہے۔