پاکستان میں 13 سے 15 اگست تک نئی بارشوں کی پیشگوئی

اسلام آباد: پاکستان کے بالائی اور وسطی حصوں میں 13 سے 15 اگست کے دوران مون سون بارشوں کا ایک نیا سلسلہ داخل ہونے کی توقع ہے، جس کے بارے میں محکمہ موسمیات (پی ایم ڈی) نے بدھ کے روز ایڈوائزری جاری کر دی ہے۔ محکمہ موسمیات کے مطابق، مون سون کی ہوائیں ملک کے بالائی علاقوں میں داخل ہو رہی ہیں جبکہ مغربی لہر بھی اس کا ساتھ دے رہی ہے۔ اس موسمی صورتحال کے باعث کشمیر، گلگت بلتستان، خیبر پختونخوا، پنجاب اور اسلام آباد کے مختلف علاقوں میں تیز ہواؤں اور گرج چمک کے ساتھ بارش کا امکان ظاہر کیا گیا ہے۔ تفصیلات کے مطابق کشمیر کے مختلف اضلاع جن میں نیلم ویلی، مظفر آباد، راولاکوٹ، پونچھ، ہٹیاں، باغ، حویلی، سدہنوتی، کوٹلی، بھمبر اور میرپور شامل ہیں، وہاں تیز ہواؤں کے ساتھ بارش متوقع ہے۔ اسی طرح گلگت بلتستان کے علاقوں دیامر، استور، غذر، سکردو، ہنزہ، گلگت، گھانچے اور شگر میں بھی بارش کی پیشگوئی کی گئی ہے۔ خیبر پختونخوا کے بالائی اضلاع بشمول دیر، چترال، سوات، کوہستان، ملاکنڈ، شانگلہ، بٹگرام، مانسہرہ، ایبٹ آباد، گلیات، بونیر، باجوڑ، مہمند، پشاور، نوشہرہ، مردان، صوابی، ہری پور، کرم اور خیبر میں بھی بارش کا امکان ہے۔ پنجاب کے شمال مشرق میں مری، سیالکوٹ، نارووال، منڈی بہاؤالدین، گجرات، گوجرانوالہ، حافظ آباد، وزیر آباد، لاہور، قصور، شیخوپورہ اور ننکانہ صاحب میں 12 اگست کی رات سے 15 اگست کے دوران وقفے وقفے سے بارش کی توقع ہے۔ اس کے علاوہ اسلام آباد، راولپنڈی اور خطہ پوٹھوہار میں بھی 13 اگست کی رات سے 15 اگست کے دوران گرج چمک اور چند مقامات پر موسلا دھار بارش کا امکان ہے۔ سرگودھا، فیصل آباد، جھنگ، ٹوبہ ٹیک سنگھ، خوشاب، لکی مروت، بھکر، ساہیوال اور ڈیرہ غازی خان سمیت دیگر اضلاع میں بھی بارش کی پیشگوئی کی گئی ہے۔ محکمہ موسمیات نے انتباہ جاری کیا ہے کہ بارشوں کے اس سلسلے کے دوران اسلام آباد، راولپنڈی، مردان، صوابی، گوجرانوالہ، گجرات، سیالکوٹ اور لاہور کے نشجو اور نچلے علاقوں میں اربن فلڈنگ کا خدشہ ہے۔ اس کے علاوہ بالائی خیبر پختونخوا، گلگت بلتستان، مری، گلیات اور کشمیر کے حساس علاقوں میں لینڈ سلائیڈنگ کا بھی خطرہ موجود ہے۔ این ڈی ایم اے کے مطابق، موجودہ مون سون کے موسم میں بارشوں کے مختلف حادثات کے نتیجے میں 155 افراد جاں بحق ہو چکے ہیں، لہذا شہریوں اور سیاحت سے وابستہ افراد کو احتیاطی تدابیر اختیار کرنے کی ہدایت کی گئی ہے۔