ناروے کے وزیر خارجہ کا پاکستان کا تاریخی دورہ، تجارت اور موسمیاتی تبدیلی پر بات چیت

اسلام آباد: ناروے کے وزیر خارجہ ایسپن بارتھ ایڈی عنقریب پاکستان کا اہم سرکاری دورہ کریں گے۔ یہ گزشتہ ایک دہائی کے دوران کسی بھی نارویجن وزیر خارجہ کا پہلا دورہ ہوگا، جسے سفارتی حلقوں میں دونوں ممالک کے تعلقات کے حوالے سے ایک انتہائی اہم پیش رفت قرار دیا جا رہا ہے۔ اس دورے کے دوران دوطرفہ تعلقات کو مزید فروغ دینے اور مختلف شعبوں میں تعاون بڑھانے کے امکانات کا جائزہ لیا جائے گا۔ ذرائع کے مطابق اس دورے کی تیاریوں کا آغاز نائب وزیر اعظم اور وزیر خارجہ سینیٹر محمد اسحاق ڈار اور نارویجن وزیر خارجہ ایسپن بارتھ ایڈی کے درمیان فلپائن کے دارالحکومت منیلا میں ہونے والی ملاقات کے بعد ہوا۔ منیلا میں دونوں رہنماؤں نے دوطرفہ امور اور باہمی دلچسپی کے حامل مختلف مسائل پر تفصیلی تبادلہ خیال کیا تھا، جہاں انہوں نے پاکستان اور ناروے کے مابین تعلقات کو نئی بلندیوں تک لے جانے کے عزم کا اعادہ کیا۔ دورے کے دوران ہونے والی باضابطہ ملاقاتوں میں اقتصادی تعاون، دوطرفہ تجارت، اور سرمایہ کاری کے فروغ پر خصوصی توجہ مرکوز کی جائے گی۔ اس کے علاوہ موجودہ عالمی منظر نامے کے پیش نظر موسمیاتی تبدیلیوں کے اثرات سے نمٹنے اور قابلِ تجدید توانائی کے شعبے میں مشترکہ اقدامات کے حوالے سے بھی اہم تفصیلی بات چیت متوقع ہے تاکہ دونوںممالک اس شعبے میں ایک دوسرے کے تجربات سے فائدہ اٹھا سکیں۔ سفارتی ماہرین کا ماننا ہے کہ اس اعلیٰ سطح کے دورے سے نہ صرف پاکستان اور ناروے کے سیاسی اور اقتصادی روابط میں تیزی آئے گی بلکہ یورپ کے اس اہم ملک کے ساتھ تجارتی حجم میں بھی خاطر خواہ اضافہ ہوگا۔ دونوں ممالک کے رہنماؤں کی جانب سے اس دورے کو پاک ناروے تعلقات کی تاریخ میں ایک سنگ میل قرار دیا جا رہا ہے جس سے مستقبل میں تعاون کے نئے دروازے کھلیں گے۔