ممبئی میں لینڈ سلائیڈنگ، سات افراد ہلاک، شدید بارشیں تباہی کا باعث

بھارت کے تجارتی مرکز ممبئی اور اس سے متصل مغربی ریاست مہاراشٹر میں موسلاادھار بارشوں کا سلسلہ جاری ہے، جس کے نتیجے میں پیش آنے والے ایک ہولناک لینڈ سلائیڈنگ کے واقعے میں کم از کم سات افراد ہلاک ہو گئے ہیں۔ مقامی حکام اور ڈیزاسٹر مینجمنٹ اتھارٹی کے مطابق، یہ المیہ شدید بارشوں کے باعث رونما ہوا جہاں پہاڑی اور نشیبی علاقے کے قریب بنے ہوئے کمزور مکانات مٹی کے تودے تلے دب گئے۔ واقعے کے فوراً بعد مقامی انتظامیہ اور ریسکیو اداروں نے فوری طور پر امدادی کارروائیوں کا آغاز کر دیا۔ حکام کا کہنا ہے کہ مرنے والوں کی تعداد میں اضافے کا خدشہ بھی ظاہر کیا جا رہا ہے کیونکہ کئی افراد اب بھی ملبے کے نیچے پھنسے ہوئے ہیں۔ ریسکیو اہلکار انتہائی مشکل حالات میں ملبے کو ہٹانے اور زندہ بچ جانے والوں کی تلاش کے لیے سرچ آپریشن چلا رہے ہیں۔ بھارت کے محکمہ موسمیات نے خطے میں مزید بارشوں کی پیشگوئی کی ہے، جس کی وجہ سے انتظامیہ نے ریڈ الرٹ جاری کر دیا ہے اور شہریوں کو غیر ضروری سفر سے گریز کرنے کی ہدایت کی ہے۔ مہاراشٹر اور ممبئی کے بیشتر حصوں میں شدید بارشوں کے باعث نظامِ زندگی شدیدمتاثر ہوا ہے۔ سڑکیں پانی میں ڈوب چکی ہیں جبکہ ٹریفک کی روانی بھی بری طرح درہم برہم ہو گئی ہے۔ حکام ندی نالوں اور پہاڑی سلسوں کے قریب رہنے والے افراد کو محفوظ مقامات پر منتقل کرنے کے لیے ہنگامی اقدامات کر رہے ہیں۔ وزیر اعلیٰ اور مقامی قیادت نے جانی نقصان پر گہرے دکھ اور افسوس کا اظہار کیا ہے اور متاثرہ خاندانوں کو ہر ممکن امداد فراہم کرنے کی یقین دہانی کرائی ہے۔