پاکستان میں 13 سے 15 اگست تک بارشوں کا نیا سلسلہ، محکمہ موسمیات کی پیشگوئی

محکمہ موسمیات (پی ایم ڈی) نے ملک کے بالائی اور وسطی حصوں میں 13 اگست سے 15 اگست کے دوران بارشوں اور گرج چمک کے نئے سلسلے کی پیشگوئی کی ہے۔ متعلقہ حکام کے مطابق اس نئے مون سون اسپیل کے باعث دریاؤں اور نالوں میں پانی کے بہاؤ میں اضافہ متوقع ہے، جس سے بعض مقامات پر سیلابی صورتحال پیدا ہو سکتی ہے۔ شہریوں کو احتیاطی تدابیر اختیار کرنے کی ہدایت جاری کی گئی ہے۔ دوسری جانب نارووال میں بین ڈرین میں طغیانی کے باعث کئی دیہات اور سڑکیں زیرِ آب آ چکی ہیں، جس سے مقامی آبادی کو شدید مشکلات کا سامنا ہے۔ متاثرہ علاقوں میں انتظامیہ کی جانب سے امدادی کارروائیاں اور نگرانی کا عمل جاری ہے تاکہ کسی بھی ہنگامی صورتحال سے بروقت نپٹا جا سکے۔ صوبائی ڈیزاسٹر مینجمنٹ اتھارٹی (پی ڈی ایم اے) کے مطابق دریائے راوی کے ملحقہ نالوں میں بھی پانی کے بہاؤ میں مسلسل اضافہ دیکھا جا رہا ہے۔ متعلقہ اداروں نے تمام اضلاع میں الرٹ جاری کر دیا ہے تاکہ دریائی کٹاؤ اور نشیبی علاقوں میں پانی بھرنے کے خطرات سے بچا جا سکے۔ ماہرینِ موسمیات کا کہنا ہے کہ اس مون سون کے دوران بالائی علاقوں میں لینڈ سلائیڈنگ کا بھی خدشہ ہے، لہذا سیاحوں اور مقامی افراد کو غیر ضروری سفر سے گریز کرنے کی مشورہ دیا گیا ہے۔