امریکہ ایران تنازع: ناروے کی جانب سے پاکستان کے کردار کی تعریف

اسلام آباد: ناروے کے وزیر خارجہ ایسپن بارتھ ایڈی نے پاکستان کے دو روزہ سرکاری دورے کے دوران امریکہ اور ایران کے درمیان جاری کشیدگی کو کم کرنے کے لیے پاکستان کے کلیدی اور تعمیری ثالثی کردار کی پرزور تحسین کی ہے۔ دارالحکومت میں نائب وزیراعظم اور وزیر خارجہ اسحاق ڈار کے ہمراہ ایک مشترکہ پریس کانفرنس سے خطاب کرتے ہوئے نارویجن وزیر خارجہ کا کہنا تھا کہ مشکل ترین حالات میں پاکستان نے جو ذمے داری اٹھائی اور اسلام آباد کو مذاکرات کے مرکز کے طور پر پیش کیا، وہ ایک قابلِ تحسین اقدام ہے۔ انہوں نے کہا کہ پاکستان کی سیاسی اور عسکری قیادت نے خطے میں امن کے قیام کے لیے جو کاوشیں کی ہیں، وہ نہ صرف عالمی امن بلکہ ناروے جیسے تجارتی ممالک کے لیے بھی انتہائی اہمیت کی حامل ہیں۔ ایسپن بارتھ ایڈی نے واضح کیا کہ ناروے ان مغربی ممالک میں شامل تھا جنہوں نے خطے میں شروع ہونے والی حالیہ جنگ کو بین الاقوامی قوانین کی کھلی خلاف ورزی قرار دیا تھا۔ انہوں نے اس عزم کا اظہار کیا کہ اگر بین الاقوامی قانون کی پاسداری کرنی ہے تو وہ ہر جگہ اور ہر ریاست کے لیے یکساں طور پر لاگو ہونا چاہیے۔ انہوں نے مزید کہا کہ سمندری گزرگاہوں کی آزادی اور کھلے سمندر میں تجارت کا تحفظ تمام ممالک کی مشترکہ ذمے داری ہے، اور اس تنازع کے دوران پاکستان اور ناروے کا مؤقف اس معاملے پر بالکل یکساں ہے۔ اپنے دورے کے دوران دونوں رہنماؤں نے دوطرفہ تعلقات، تجارت، سرمایہ کاری، ماحولیاتی تبدیلی اور سمندری امور سمیت مختلف شعبوں میں تعاون کو مزید فروغ دینے پر تفصیلی تبادلہ خیال کیا۔ نارویجن وزیر خارجہ نے ناروے میں مقیم پاکستانی نژاد کمیونٹی کے مثبت کردار کی بھی تعریف کی جو دونوں ملکوں کے درمیان ایک مضبوط پل کا کردار ادا کر رہے ہیں۔ انہوں نے کہا کہ ناروے کی سیاست اور معاشرے میں پاکستانی نژاد افراد کی موجودگی دونوں ممالک کے دوستانہ تعلقات کو مزید مستحکم کرتی ہے۔ دفتر خارجہ کے مطابق، وفد کی سطح پر ہونے والی ان ملاقاتوں میں خطے کی دیگر اہم پیش رفت بشمول مشرق وسطیٰ، افغانستان اور کشمیر کے امور پر بھی گہرائی سے بات چیت کی گئی۔ نارویجن وزیر خارجہ نے پاکستان، سعودی عرب اور ترکیہ کے درمیان حال ہی میں طے پانے والے دفاعی معاہدے پر بھی مسرت کا اظہار کیا۔ انہوں نے امید ظاہر کی کہ پاکستان اور ناروے کے مابین اقتصادی اور تجارتی تعلقات میں آنے والے دنوں میں مزید وسعت آئے گی، جو دونوں ممالک کے عوام کے مفاد میں ہے۔