ہیکنی کونسل کا حیفہ کے ساتھ جڑواں شہر کا رشتہ ختم کرنے کا فیصلہ

برطانیہ کے علاقے ہیکنی کی کونسل میں سیاسی تبدیلی کے بعد ایک اہم فیصلہ زیر غور ہے جس کے تحت اسرائیلی شہر حیفہ کے ساتھ جڑواں شہر (Twin City) کا تاریخی رشتہ ختم کیا جا سکتا ہے۔ حالیہ سیاسی تبدیلی کے نتیجے میں گرین پارٹی نے کونسل کا کنٹرول سنبھال لیا ہے، جو طویل عرصے سے لیبر پارٹی کے پاس تھا۔ پارٹی کی نئی قیادت نے اس معاملے پر سنجیدگی سے غور شروع کر دیا ہے اور مقامی سطح پر اس اقدام کو فلسطین کے ساتھ اظہار یکجہتی قرار دیا جا رہا ہے۔ گرین پارٹی کے رہنماؤں کا مؤقف ہے کہ غزہ میں جاری اسرائیلی جنگ اور وہاں ہونے والی انسانی تباہی کے تناظر میں کسی بھی ایسے شہر کے ساتھ رسمی تعلقات جاری رکھنا جو اسرائیل کی عسکری پالیسیوں کی علامت سمجھا جاتا ہو، اخلاقی طور پر درست نہیں۔ کونسل کے ارکان کا کہنا ہے کہ یہ فیصلہ ہیکنی کے باضمیر شہریوں کے جذبات کی عکاسی کرتا ہے جو مشرق وسطیٰ میں امن اور انسانی حقوق کے زبردست حامی ہیں۔ اس مجوزہ فیصلے پر کونسل کے اندر اور باہر بحث کا سلسلہ شروع ہو چکا ہے، جہاں حامی اور مخالفین اپنے اپنے دلائل دے رہے ہیں۔ اگرچہ حیفہ کے ساتھ اس تعلق کے خاتمے سے بین الاقوامی سطح پر علامتی اثرات مرتب ہوں گے، تاہم مقامی کونسل کے اس قدم کو دنیا بھر میں انسانی حقوق کی تنظیموں کی طرف سے سراہا جا رہا ہے۔ کونسل کے ترجمان کا کہنا ہے کہ اس تجاویز پر آئندہ اجلاسوں میں مزید تفصیلی غور کیا جائے گا تاکہ حتمی فیصلہ قانون اور ضابطے کے مطابق کیا جا سکے۔