ایران نے آبنائے ہرمز پر امریکی کنٹرول کا دعویٰ مسترد کر دیا

تہران نے آبنائے ہرمز پر امریکی کنٹرول سے متعلق بیانات کو سختی سے مسترد کرتے ہوئے انہیں بے بنیاد اور سراسر جھوٹ قرار دیا ہے۔ ایرانی حکام کا کہنا ہے کہ دنیا کی یہ اہم ترین تیل گزرگاہ مکمل طور پر ایران کے کنٹرول اور اس کی دفاعی نگرانی میں ہے۔ یہ ردعمل ایسے وقت میں سامنے آیا ہے جب خطے میں کشیدگی کے دوران مختلف بیانات کا سلسلہ جاری ہے۔ امریکہ کی جانب سے ماضی اور حالیہ دنوں میں دیے گئے بیانات میں آبنائے ہرمز پر اثر و رسوخ یا کنٹرول رکھنے کے دعوے کیے گئے تھے، جنہیں تہران نے مسترد کر دیا۔ ایرانی حکام کا اصرار ہے کہ اس خطے میں سلامتی اور بحری نقل و حرکت کو برقرار رکھنا ان کی ذمہ داری ہے اور کسی بھی بیرونی طاقت کا دعویٰ حقائق کے منافی ہے۔ اس صورتحال کے پیش نظر خطے میں سفارتی اور سیاسی سرگرمیاں بھی تیز ہو گئی ہیں، جہاں مختلف ممالک کے درمیان ثالثی کی کوششیں بھی جاری ہیں۔ ایران اور امریکہ کے درمیان بڑھتی ہوئی لفظی جنگ کے باعث عالمی منڈی میں توانائی کی ترسیل اور بحری راستوں کی سلامتی کے حوالے سے خدات میں اضافہ دیکھا جا رہا ہے۔ بین الاقوامی تجزیہ کاروں کے مطابق آبنائے ہرمز دنیا بھر میں تیل کی ترسیل کے لیے ایک انتہائی حساس اور کلیدی مقام کی حیثیت رکھتی ہے۔ اس گزرگاہ پر کسی بھی قسم کی کشیدگی یا تنازع کے عالمی معیشت اور توانائی کی سپلائی لائنز پر براہ راست اثرات مرتب ہو سکتے ہیں، جس پر عالمی برادری گہری نظر رکھے ہوئے ہے۔