اسحاق ڈار کی صومالی قزاقوں کے قبضے سے پاکستانی یرغمالیوں کی رہائی کے لیے ہدایات

اسلام آباد: نائب وزیراعظم اور وزیر خارجہ اسحاق ڈار نے صومالی بحری قزاقوں کے قبضے میں موجود پاکستانی ملاحوں کی فوری اور بحفاظت رہائی کو یقینی بنانے کے لیے سفارتی کوششیں مزید تیز کرنے کی سخت ہدایات جاری کی ہیں۔ ذرائع کے مطابق وزارت خارجہ اس معاملے پر انتہائی سنجیدگی سے کام کر رہی ہے اور بین الاقوامی شراکت داروں کے ساتھ رابطے بھی بڑھا دیے گئے ہیں۔ یاد رہے کہ صومالی قزاقوں کے پاس اس وقت دس پاکستانی ملاح یرغمال بنے ہوئے ہیں جن کی رہائی کے لیے حکومتِ پاکستان پہلے دن سے ہی کوشاں ہے۔ نائب وزیراعظم نے متعلقہ حکام کو ہدایت کی ہے کہ وہ تمام دستیاب سفارتی ذرائع اور بین الاقوامی بحری تعاون کے پلیٹ فارمز کو استعمال کرتے ہوئے ان پاکستانی شہریوں کی جلد از جلد بازیابی کو یقینی بنائیں تاکہ وہ اپنے خاندانوں کے پاس بحفاظت واپس پہنچ سکیں۔ حکومتی سطح پر یہ عزم ظاہر کیا گیا ہے کہ پاکستانی شہریوں کی جان و مال کا تحفظ اولین ترجیح ہے اور اس مقصد کے لیے تمام ممکنہ اقدامات کیے جا رہے ہیں۔ وزارتِ خارجہ کے ترجمان کا کہنا ہے کہ صومالیہ اور خطے کے دیگر ممالک میں موجود پاکستانی سفارت خانے بھی مقامی حکام کے ساتھ مسلسل رابطے میں ہیں تاکہ یرغمالیوں کی رہائی کی راہ میں حائل رکاوٹوں کو دور کیا جا سکے۔ اسحاق ڈار نے اس بات پر بھی زور دیا کہ بحری قزاقوں کے خلاف بین الاقوامی سطح پر جاری کارروائیوں میں بھی پاکستان اپنا فعال کردار ادا کرتا رہے گا تاکہ مستقبل میں اس قسم کے واقعات کی روک تھام کی جا سکے اور پاکستانی ملاحوں کے حقوق کا تحفظ کیا جا سکے۔