پنجاب میں پیپرلیس گورننس: تمام سرکاری خدمات اب آن لائن

لاہور: پنجاب حکومت نے صوبے بھر میں 'پیپرلیس گورننس' کے نظام کا باقاعدہ آغاز کر دیا ہے، جس کا مقصد گورنمنٹ ٹو گورنمنٹ، گورنمنٹ ٹو بزنس اور گورنمنٹ ٹو سٹیزن خدمات کو مکمل طور پر خودکار اور ڈیجیٹل بنانا ہے۔ وزیراعلیٰ پنجاب مریم نواز نے اس اقدام کو صوبے کی تاریخ میں ایک سنگ میل قرار دیتے ہوئے کہا ہے کہ پنجاب ملک کا پہلا صوبہ ہے جس نے ای-فاس، ای-پرکیورمنٹ، ای-پے، ای-آکشن، ون میپ اور ایچ آر ایم آئی ایس جیسے جدید سسٹمز کو مربوط کر دیا ہے۔ وزیراعلیٰ نے ایک آن لائن اجلاس کی صدارت کرتے ہوئے پی آئی ٹی بی حکام کو ہدایت کی کہ پیپرلیس آٹومیشن سافٹ ویئر کے استعمال کو مزید موثر بنایا جائے اور درخواست گزاروں سے مسلسل فیڈ بیک لیا جائے تاکہ سسٹم کی بہتری جاری رہے۔ اس موقع پر وزیراعلیٰ پنجاب مریم نواز نے کہا کہ پیپرلیس نظام کا بنیادی مقصد سرکاری دفاتر میں سائلین کی آمد و رفت کو کم کرنا اور کرپشن کے عناصر کا خاتمہ کرنا ہے۔ انہوں نے وضاحت کی کہ ڈیجیٹل سسٹم کے تحت سائلین کی شناخت ظاہر کیے بغیر خدمات کی فراہمی ممکن ہوگی، جس سے شفافیت میں اضافہ ہوگا۔ اجلاس میں بریفنگ دیتے ہوئے چیئرمین پنجاب انفارمیشن ٹیکنالوجی بورڈ (پی آئی ٹی بی) فیصل یوسف نے بتایا کہ صوبے کے 6 ہزار سے زائد سسٹمز کو سینٹرل سسٹم کے ساتھ منسلک کر دیا گیا ہے، جبکہ 600 ادارے ای-فاس کے ذریعے ڈیجیٹل طور پر جڑ چکے ہیں۔ ای-فائلنگ سسٹم کے ذریعے اب تک لاکھوں سمری نوٹس جاری کیے جا چکے ہیں جس سے قومی خزانے کو کروڑوں روپے کی بچت ہوئی ہے۔ اجلاس کو مزید بتایا گیا کہ ترقیاتی منصوبوں کی اسمارٹ مانیٹرنگ کے ذریعے شفافیت کا ایک نیا معیار قائم کیا گیا ہے۔ صوبہ بھر میں ای-پرکیورمنٹ سسٹم سے 25 ہزار سے زائد سپلائرز منسلک ہو چکے ہیں، جن کے ذریعے کھربوں روپے کی خریداری اور لاکھوں ٹینڈرز کا عمل مکمل شفافیت کے ساتھ انجام پایا ہے۔ اس نظام کے ذریعے کسی سرکاری دفتر میں حاضر ہوئے بغیر ٹینڈرنگ کا عمل ممکن بنایا گیا ہے، جس سے نہ صرف وقت کی بچت ہوئی ہے بلکہ بدعنوانی کی گنجائش بھی ختم ہو گئی ہے۔ وزیراعلیٰ نے تمام محکموں کو ہدایت کی کہ وہ اس ڈیجیٹل تبدیلی کو ہر قیمت پر کامیاب بنائیں تاکہ عوامی مسائل کا فوری حل یقینی بنایا جا سکے۔