مستونگ میں وزیر داخلہ بلوچستان کے قافلے پر حملہ، 3 اہلکار زخمی

کوئٹہ سے موصول ہونے والی اطلاعات کے مطابق بلوچستان کے وزیر داخلہ میر ضیاء اللہ لانگو کا سیکیورٹی قافلہ مستونگ کے قریب مسلح افراد کی فائرنگ کی زد میں آگیا۔ یہ واقعہ اس وقت پیش آیا جب قافلہ قلات سے کوئٹہ کی طرف سفر کر رہا تھا اور راستے میں نامعلوم حملہ آوروں نے اس پر اچانک فائرنگ شروع کر دی۔ اس حملے کے نتیجے میں سیکیورٹی کے تین اہلکار زخمی ہو گئے جنہیں فوری طور پر طبی امداد کے لیے قریبی ہسپتال منتقل کر دیا گیا ہے۔ حکام کے مطابق زخمی ہونے والے اہلکاروں کی حالت اب خطرے سے باہر بتائی جا رہی ہے۔ فائرنگ کے اس واقعے کے بعد سیکیورٹی فورسز نے فوری طور پر مورچہ سنبھالا اور حملہ آوروں کی طرف سے کی جانے والی فائرنگ کا بھرپور جواب دیا۔ سیکورٹی اہلکاروں کی جوابی کارروائی کے بعد حملہ آور موقع سے فرار ہونے میں کامیاب ہو گئے، تاہم علاقے میں بڑے پیمانے پر سرچ آپریشن شروع کر دیا گیا ہے۔ اعلیٰ سیکورٹی حکام نے واقعے کا سخت نوٹس لیتے ہوئے ملزمان کی جلد گرفتاری کے لیے احکامات جاری کر دیے ہیں اور تحقیقات کا آغاز کر دیا گیا ہے۔ اس طرح کے واقعات کے باوجود صوبائی حکومت کا کہنا ہے کہ صوبے میں امن و امان کی بحالی اور دہشت گردی کے خاتمے کے لیے سیکیورٹی ادارے پرعزم ہیں اور ملک دشمن عناصر کے خلاف کارروائیاں بلا تعطل جاری رہیں گی۔