عالمی منڈی میں تیل کی قیمتیں: امریکی دھمکیوں کے بعد اضافے کا رجحان

عالمی مارکیٹ میں تیل کی قیمتوں میں ہفتہ وار بنیادوں پر اضافے کا رجحان دیکھا جا رہا ہے، جس کی بنیادی وجہ امریکہ کی جانب سے ایران کے خلاف غیر معینہ مدت تک سمندری ناکہ بندی کی دھمکی اور بڑھتی ہوئی کشیدگی ہے۔ عالمی خبر رساں اداروں کے مطابق واشنگٹن تہران کو بین الاقوامی سطح پر مکمل طور پر الگ تھلگ کرنے کے لیے ایسے اقتصادی اور عسکری ہتھکنڈے استعمال کرنے کا ارادہ رکھتا ہے جو اس سے پہلے کبھی نہیں دیکھے گئے۔ امریکی بحریہ کو بھی خطے میں درپیش چیلنجز سے نمٹنے کے لیے متحرک کر دیا گیا ہے۔دوسری جانب خطے میں بحری آمدورفت اور تجارت شدید متاثر ہو رہی ہے۔ اطلاعات کے مطابق امریکہ نے ناکہ بندی کی خلاف ورزی کرنے والے ایک جہاز پر فائرنگ بھی کی ہے، جبکہ پاکستان کے قریب ایک کنٹینر جہاز پر ہیلفائر میزائل لگنے کی بھی تصدیق کی گئی ہے۔ ان واقعات نے بین الاقوامی تجارت اور توانائی کے سپلائی چین کے لیے سنگین خدکات پیدا کر دیے ہیں، جس کے اثرات براہ راست عالمی معیشت پر پڑ رہے ہیں۔ماہرین اقتصادیات کا کہنا ہے کہ اگر صورتحال مزید کشیدہ ہوتی ہے اور یہ ناکہ بندی طویل عرصے تک جاری رہتی ہے، تو تیل کی ترسیل میں رکاوٹ کی وجہ سے صارفین کو قیمتوں میں مزید اضافے کا سامنا کرنا پڑ سکتا ہے۔ عالمی رہنما خطے میں جنگ کے خطرات کو ٹالنے اور سفارتی حل تلاش کرنے کے لیے مختلف سطح پر رابطے کر رہے ہیں، تاہم فی الحال کشیدگی میں کمی کے کوئی واضح آثار نظر نہیں آ رہے ہیں۔