اسلام آباد پولیس کو چودہ سال بعد تیس نئی گاڑیاں فراہم

اسلام آباد میں امن و امان کی صورتحال کو بہتر بنانے اور پولیس کی نقل و حرکت کو تیز کرنے کے لیے ایک اہم قدم اٹھاتے ہوئے چودہ سال کے طویل انتظار کے بعد وفاقی دارالحکومت کے ستائیس پولیس اسٹیشنز کو تیس نئی گاڑیاں فراہم کر دی گئی ہیں۔ اس سلسلے میں پولیس لائنز اسلام آباد میں ایک پروقار تقریب کا انعقاد کیا گیا جس میں وزیر داخلہ محسن نقوی اور وزیر مملکت برائے داخلہ طلال چودھری نے خصوصی طور پر شرکت کی اور نئی گاڑیوں کی چابیاں متعلقہ پولیس حکام کے حوالے کیں تاکہ فورس کی کارکردگی کو مزید موثر بنایا جا سکے۔ تقریب سے خطاب کرتے ہوئے وزیر داخلہ محسن نقوی نے اس بات پر زور دیا کہ جدید پولیسنگ کا تصور فرسودہ اور ناکارہ گاڑیوں کے ساتھ ناممکن ہے۔ انہوں نے واضح کیا کہ صرف وقت کے تقاضوں کے مطابق پولیس کی تمام ضروریات کو پورا کر کے ہی مطلوبہ نتائج حاصل کیے جا سکتے ہیں اور یہ نئی گاڑیاں یقیناً ہنگامی صورتحال میں پولیس کے رسپانس ٹائم کو نمایاں طور پر بہتر بنائیں گی۔ وزیر داخلہ کا کہنا تھا کہ عوامی تحفظ اور سیکیورٹی کو یقینی بنانے کے لیے اسلام آباد پولیس کو تمام ضروری وسائل ترجیحی بنیادوں پر فراہم کیے جا رہے ہیں تاکہ اہلکار اپنے فرائض مزید بہتر طریقے سے انجام دے سکیں۔ اس موقع پر وزیر مملکت برائے داخلہ طلال چودھری نے تفصیلی گفتگو کرتے ہوئے بتایا کہ یہ نئی گاڑیاں اسلام آباد کے تمام ستائیس تھانوں میں تقسیم کی گئی ہیں کیونکہ پولیس فورس چودہ سال پرانی گاڑیوں پر گزارا کرنے پر مجبور تھی۔ انہوں نے مزید بتایا کہ نہ صرف گاڑیوں کی فراہمی بلکہ تمام تھانوں کی تعمیر و مرمت کا کام بھی تیزی سے جاری ہے جو رواند سال کے اندر مکمل کر لیا جائے گا۔ ان کا یہ بھی کہنا تھا کہ فورس میں عملے کی کمی کو پورا کرنے کے لیے نو ہزارنئے اہلکاروں کی میرٹ پر بھرتی کی جا رہی ہے تاکہ اسلام آباد پولیس کو پورے ملک کے لیے ایک بہترین ماڈل فورس بنایا جا سکے اور شہریوں کو بہترین سیکیورٹی فراہم کی جا سکے۔