پاکستانی طلباء کے برطانوی ویزا تاخیر: برطانیہ کی اعظم نذیر تارڑ کو مسئلہ حل کرنے کی یقین دہانی

اسلام آباد میں وفاقی وزیر برائے قانون و انصاف سینیٹر اعظم نذیر تارڑ سے برطانوی ہائی کمشنر جین میریٹ نے ملاقات کی، جس میں اعلیٰ تعلیم کے لیے برطانیہ جانے والے پاکستانی طلباء کو درپیش ویزا تاخیر کے معاملے پر تفصیلی گفتگو کی گئی۔ ملاقات کے دوران دونوں رہنماؤں نے پاکستان اور برطانیہ کے مابین دوطرفہ تعلقات، باہمی دلچسپی کے امور اور تعلیمی شعبے میں تعاون کو مزید مضبوط بنانے کے طریقوں پر تبادلہ خیال کیا۔ اس موقع پر وزیر مملکت برائے قانون، انصاف و انسانی حقوق بیرسٹر عقیل ملک بھی موجود تھے۔ ملاقات کے دوران وفاقی وزیر قانون نے پاکستانی طلباء کو برطانوی ویزوں کی منظوری میں ہونے والی غیر معمولی تاخیر پر حکومتی تشویش سے برطانوی ہائی کمشنر کو آگاہ کیا۔ انہوں نے بتایا کہ ویزا پروسیسنگ میں تاخیر کے باعث صدہا پاکستانی طلباء شدید مشکلات کا شکار ہیں اور اس بات کا قوی خدشہ ہے کہ ویزے بروقت نہ ملنے کی صورت میں ان کا پورا تعلیمی سال ضائع ہو جائے گا۔ اعظم نذیر تارڑ نے اس بات پر زور دیا کہ بیرون ملک تعلیم حاصل کرنے کے خواہشمند پاکستانی طلباء کی راہ میں حائل تمام رکاوٹوں کو فوراً دور کیا جائے اور انہیں ویزا کے عمل میں ممکنہ سہولیات فراہم کی جائیں۔ وفاقی وزیر نے برطانوی سفیر کو آگاہ کیا کہ وزیر اعظم کی ہدایت پر ان کی سربراہی میں ایک خصوصی کمیٹی تشکیل دی گئی ہے جو بیرون ملک زیر تعلیم پاکستانی طلباء سے متعلق قانونی اور ادارہ جاتی ڈھانچے کو بہتر بنانے کے لیے کام کر رہی ہے۔ انہوں نے بتایا کہ اس کمیٹی نے اپنی سفارشات کو حتمی شکل دے دی ہے تاکہ بیرون ملک جانے والے طلباء کے مسائل کے فوری حل کے لیے ایک مؤثر اور پائیدار طریقہ کار وضع کیا جا سکے۔ اس اقدام کا مقصد طالب علموں کے حقوق کا تحفظ اور ان کے تعلیمی سفر کو آسان بنانا ہے۔ برطانوی ہائی کمشنر جین میریٹ نے وفاقی وزیر قانون کو یقین دہانی کروائی کہ پاکستانی طلباء کو ویزوں کی فراہمی میں تاخیر کے مسئلے کو ترجیحی بنیادوں پر حل کیا جائے گا۔ انہوں نے کہا کہ برطانوی حکومت پاکستانی طلباء کی تعلیمی خدمات کو قدر کی نگاہ سے دیکھتی ہے اور اس تاخیر کو دور کرنے کے لیے اقدامات اٹھائے جا رہے ہیں۔ ملاقات میں پاکستان اور برطانیہ کے درمیان تعلیمی روابط کو مزید فروغ دینے اور دونوں ممالک کے اداروں کے درمیان باہمی تعاون و اشتراک کار کو وسیع کرنے پر بھی کامل اتفاق کیا گیا۔