مارک کیوبن کا انتباہ: امیر افراد کے لیے خطرناک سرمایہ کاری

مشہور امریکی ارب پتی اور سرمایہ کار مارک کیوبن نے حال ہی میں ایک انٹرویو کے دوران کھلاڑیوں اور نامور شخصیات کو خبردار کیا ہے کہ وہ اپنی دولت کے تحفظ کے لیے ہوشیار رہیں۔ ان کا کہنا ہے کہ غلط قسم کی سرمایہ کاری نہ صرف عام افراد بلکہ انتہائی امیر لوگوں کے لیے بھی مالی تباہی کا باعث بن سکتی ہے۔ مارک کیوبن کے مطابق، بہت سے کھلاڑی اپنے کیریئر کے عروج پر کروڑوں ڈالر کماتے ہیں لیکن ناقص مالیاتی فیصلوں کی وجہ سے جلد ہی مشکلات کا شکار ہو جاتے ہیں۔ انہوں نے اس بات پر زور دیا کہ ناتجربہ کار مشیروں پر اندھا اعتماد کرنا اور بلند و بانگ دعوے کرنے والےمنصوبوں میں رقم لگانا خطرناک ثابت ہوتا ہے۔ مارک کیوبن نے واضح کیا کہ ایسے پراجیکٹس جن میں خطرہ زیادہ ہو اور حقیقی بنیادیں کمزور ہوں، وہ دراصل دولت مند افراد کے لیے 'موت' کے مترادف ہیں۔ ماهرین کا کہنا ہے کہ کھلاڑیوں اور شوبز شخصیات کو اپنے کیریئر کے دوران کمائی گئی رقم کو بچانے اور بڑھانے کے لیے معاشی ماہرین کی درست رہنمائی لینی چاہیے۔ اگر درست حکمت عملی کے تحت سرمایہ کاری نہ کی جائے تو بڑی سے بڑی دولت بھی چند سالوں میں ختم ہو سکتی ہے۔ مارک کیوبن نے یہ بھی مشورہ دیا کہ روایتی اور محفوظ اثاثوں میں سرمایہ کاری کو ترجیح دی جانی چاہیے تاکہ مستقبل میں کسی بھی قسم کے معاشی بحران سے بچا جا سکے۔