پری نپشل معاہدے کیا ہیں اور نوجوانوں میں ان کا رجحان کیوں بڑھ رہا ہے

جدید دور میں شادی کے بندھن میں بندھنے والے نوجوان جوڑوں کے درمیان اب شادی سے پہلے مالی معاملات کو شفاف بنانے کا رجحان تیزی سے فروغ پا رہا ہے۔ حالیہ اعداد و شمار کے مطابق اب تقریبا ہر تین میں سے ایک نوجوان جوڑا شادی کے معاہدے یعنی 'پری نپ' (Prenup) پر دستخط کر رہا ہے۔ اس اقدام کا مقصد مستقبل میں کسی بھی ناخوشگوار صورتحال یا طلاق کی صورت میں جائیداد اور اثاثوں کی تقسیم کو لے کر تنازعات سے بچنا ہے۔ماہرین کے مطابق اس رجحان میں اضافے کی بڑی وجہ یہ ہے کہ نوجوان اب شادی جیسے مقدس رشتے میں داخل ہوتے وقت عملیت پسندی سے کام لے رہے ہیں۔ ان کا ماننا ہے کہ محبت اور جذبات اپنی جگہ لیکن مالی معاملات کو پہلے سے طے کرنا کوئی بداشگونی نہیں بلکہ ایک ذمہ دارانہ رویہ ہے۔ ماضی میں ایسے معاہدوں کو طلاق کی پیشگوئی یا بے اعتمادی کی علامت سمجھا جاتا تھا، لیکن اب معاشرتی رویے اس معاملے میں کافی حد تک بدل چکے ہیں۔دوسری جانب قانونی ماہرین کا بھی کہنا ہے کہ شادی سے پہلے اس قسم کے معاہدے کرنے سے طلاق کے وقت ہونے والی ذہنی کوفت اور عدالتوں کے چکر کاٹنے سے نجات مل جاتی ہے۔ جب دونوں فریقین باہمی رضامندی سے اپنے اثاثے، قرضے اور جائیداد کی ملکیت کا فیصلہ پہلے ہی کر لیتے ہیں، تو بعد میں تلخیوں کے امکانات بہت کم ہوجاتے ہیں۔ یہی وجہ ہے کہ اب نوجوان جوڑے جذباتی ہونے کے بجائے حقیقت پسندانہ فیصلے کرنے کو ترجیح دے رہے ہیں تاکہ مستقبل میں کسی بھی قانونی یا مالی مشکل سے محفوظ رہا جا سکے۔