یوکرین کا نیا ڈرون حملہ: روس کا ٹی یو 95 بمبار طیارہ تباہ

یوکرین نے دفاعی ٹیکنالوجی کی دنیا میں ایک حیرت انگیز کارنامہ انجام دیتے ہوئے محض 48 ہزار ڈالر مالیت کا ایک طویل فاصلے کا حملہ آور ڈرون تیار کر لیا ہے۔ میڈیا رپورٹس کے مطابق اس ڈرون نے حال ہی میں روس کے اہم انگلز ٹو ایئر بیس پر کھڑے ایک قیمتی ٹوپولیو ٹی یو 95 ایم ایس اسٹریٹجک بمبار طیارے کو نشانہ بنا کر تباہ کر دیا ہے۔ یہ ڈرون مبینہ طور پر ایک ایسے چینی طیارے کا ریورس انجینئرڈ نسخہ ہے جسے چین نے فروخت کرنے سے صاف انکار کر دیا تھا۔ یوکرین کے انجینئرز نے مبینہ طور پر چینی فیکٹری کے دورے کے دوران خفیہ تصاویر حاصل کیں اور ان کی مدد سے اس کا سستا اور مؤثر متبادل تیار کیا۔ اس نئے خودکش اور حملہ آور ڈرون کی مار کی صلاحیت دو ہزار کلومیٹر تک بتائی جاتی ہے جو اسے طویل فاصلے کے اہداف کو نشانہ بنانے کے قابل بناتی ہے۔ دفاعی تجزیہ کاروں کے مطابق یوکرین کی دفاعی صنعت اس طرز کے سالانہ چھ ہزار اڑنے والے پروں (فائینگ ونگ) والے ڈرون تیار کرنے کی صلاحیت رکھتی ہے۔ کم لاگت اور زیادہ رینج کی حامل یہ ٹیکنالوجی جنگی میدان میں روایتی عسکری توازن کو یکسر بدل کر رکھ رہی ہے، جہاں سستے ہتھیاروں کے ذریعے کروڑوں ڈالر کے جنگی اثاثوں کو نشانہ بنایا جا رہا ہے۔ روسی فضائی اڈے پر ہونے والے اس حملے نے ماسکو کی دفاعی حکمت عملی پر کئی سوالیہ نشان کھڑے کر دیے ہیں۔ ماہرین کا کہنا ہے کہ اس قدر کم لاگت میں تیار ہونے والے طویل فاصلے کے ڈرونز کا بڑے پیمانے پر حصول یوکرین کے لیے ایک اسٹریٹجک برتری ثابت ہو رہا ہے۔ اگرچہ روس کی جانب سے اس واقعے اور نقصانات پر تاحال گہرا سکتہ طاری ہے، تاہم بین الاقوامی دفاعی حلقوں میں اس کم لاگت مگر انتہائی تباہ کن ڈرون ٹیکنالوجی کے چرچے عام ہو چکے ہیں جو آنے والے دنوں میں جنگ کا رخ موڑنے کی پوری صلاحیت رکھتی ہے۔