حکومت کا چھوٹے تاجروں کے لیے آسان ٹیکس موبائل ایپ کا اجراء

حکومت پاکستان نے چھوٹے تاجروں اور دکانداروں کی سہولت کے لیے 'فکسڈ ٹیکس آسان اسکیم' کے تحت ایک جدید موبائل ایپلیکیشن کا باضابطہ اجرا کر دیا ہے۔ اس نئی ایپ کا مقصد چھوٹے کاروبار کرنے والے افراد کو ٹیکس کے دائرہ کار میں لانا اور ان کے لیے ٹیکس ریٹرن جمع کرانے کے عمل کو انتہائی آسان بنانا ہے۔ اس بات کا اعلان وفاقی دارالحکومت میں ایک پرہجوم پریس کانفرنس کے دوران کیا گیا جہاں وزیر مملکت برائے خزانہ بلال اظہر کیانی اور وفاقی وزیر خزانہ محمد اورنگزیب بھی موجود تھے۔ تقریب میں تاجر برادری کے نمائندگان نے بھی شرکت کی۔ وزیر مملکت برائے خزانہ بلال اظہر کیانی نے میڈیا سے گفتگو کرتے ہوئے کہا کہ اس موبائل ایپ کا اجرا دراصل اس منصوبے کا عملی آغاز ہے جس پر حکومت پچھلے چند مہینوں سے مسلسل کام کر رہی تھی۔ انہوں نے تاجر برادری کو اس کامیاب اجراء پر مبارکباد پیش کی اور واضح کیا کہ یہ ایپ تمام اسٹیک ہولڈرز بالخصوص تاجر رہنماؤں کی مشاورت اور رہنمائی سے تیار کی گئی ہے۔ ان کا کہنا تھا کہ اس اسکیم کا بنیادی مقصد ماضی کی غلطیوں سے سیکھتے ہوئے ایک ایسا نظام بنانا تھا جو تاجروں کے لیے دوستانہ ہو اور جس سے ایف بی آر کے ساتھ معاملات سلجھانا آسان ہو جائیں۔ اس موبائل ایپ کی نمایاں خصوصیات کا ذکر کرتے ہوئے حکام نے بتایا کہ وہ تمام تاجر جن کا سالانہ ٹرن اوور بیس کروڑ روپے سے کم ہے، وہ اس اسکیم سے فائدہ اٹھا سکتے ہیں۔ ایپ میں ایک آسان سا اردو فارم موجود ہے جسے گوگل پلے اسٹور سے 'آسان تاجر' کے نام سے ڈاؤن لوڈ کیا جا سکتا ہے۔ رجسٹریشن کے عمل کے دوران ایک پی ایس آئی ڈی (PSID) جنریٹ ہوگی جس کے ذریعے تاجر باآسانی اپنا ٹیکس ادا کر سکیں گے۔ ادائیگی کے بعد صارفین کو اسکیم میں شمولیت اور ان کے ٹیکس فائلر بننے کی فوری اطلاع دی جائے گی، جبکہ انہیں ایک ڈیجیٹل تختی یا پلیٹ بھی فراہم کی جائے گی۔ وزیر خزانہ محمد اورنگزیب نے پریس کانفرنس سے خطاب کرتے ہوئے اس عزم کا اعادہ کیا کہ حکومت ٹیکس کے نظام کو مزید آسان اور شفاف بنانے کے لیے پرعزم ہے۔ انہوں نے کہا کہ ماضی میں ون سائز فٹس آل کی پالیسی ناکام رہی لیکن اس بار چھوٹے دکانداروں کی مشکلات کا خصوصی خیال رکھا گیا ہے۔ اس اسکیم کے تحت رجسٹر ہونے والے تاجروں کو دکانوں پر پی او ایس (POS) مشینیں نصب کرنے کی ضرورت نہیں ہوگی اور نہ ہی انہیں ودہولڈنگ ایجنٹ کے طور پر کام کرنا پڑے گا۔ حکومت کا یہ اقدام ملکی معیشت کو دستاویزی شکل دینے اور تاجروں کا اعتماد بحال کرنے کی جانب ایک اہم قدم قرار دیا جا رہا ہے۔