نواز شریف کی مظفر گڑھ کے اراکین اسمبلی سے ملاقات، سیاسی سرگرمیاں تیز

پاکستان مسلم لیگ ن کے قائد اور سابق وزیر اعظم مواز شریف نے اپنی سیاسی رابطہ مہم میں نمایاں تیزی لاتے ہوئے مختلف علاقوں کے اراکین اسمبلی اور پارٹی رہنماؤں سے ملاقاتوں کا سلسلہ شروع کر دیا ہے۔ اسی سلسلے میں انہوں نے مظفر گڑھ سے تعلق رکھنے والے مسلم لیگ ن کے اراکین اسمبلی سے ایک اہم ملاقات کی جس میں پارٹی امور، ترقیاتی منصوبوں اور موجودہ سیاسی صورتحال پر تفصیلی تبادلہ خیال کیا گیا۔ ملاقات کے دوران اراکین اسمبلی نے قائدِ جماعت کو اپنے حلقوں کے مسائل اور عوامی توقعات سے آگاہ کیا۔ اراکین نے نواز شریف اور وزیر اعلیٰ پنجاب مریم نواز کی قیادت پر مکمل اعتماد کا اظہار کرتے ہوئے صوبے بھر میں ریکارڈ ترقیاتی منصوبے شروع کرنے پر انہیں شاندار خراجِ تحسین پیش کیا۔ دوسری جانب وزیر اعلیٰ پنجاب مریم نواز بھی صوبے کے مختلف اضلاع کے اراکین اسمبلی سے مسلسل ملاقاتیں کر رہی ہیں اور انہوں نے اوکاڑہ کے اراکین کو بھی عوامی مسائل کے ترجیحی بنیادوں پر حل کی یقین دہانی کروائی ہے۔ سیاسی تجزیہ کاروں کے مطابق ان ملاقاتوں کا بنیادی مقصد پارٹی کو نچلی سطح پر مزید منظم کرنا اور آئندہ کے سیاسی لائحہ عمل کے لیے تمام رہنماؤں کو متحرک کرنا ہے۔ نواز شریف کی جانب سے سیاسی سرگرمیوں میں اس اضافے کو حکومتی کارکردگی بہتر بنانے اور عوامی رابطہ مہم کو وسعت دینے کی کوشش کے طور پر دیکھا جا رہا ہے۔