وزیراعظم شہباز شریف اور شامی وزیر خارجہ کی ملاقات، تعاون بڑھانے پر اتفاق

اسلام آباد: وزیراعظم محمد شہباز شریف نے کہا ہے کہ پاکستان اور شام کے درمیان طویل عرصے سے قائم دوستانہ تعلقات کو اب عملی اور مضبوط دوطرفہ تعاون میں تبدیل کرنے کی ضرورت ہے۔ یہ بات انہوں نے جمعرات کے روز اسلام آباد میں دورے پر آئے ہوئے شامی وزیر الخارجہ اسعد حسن الشیبانی سے ملاقات کے دوران کہی۔ وزیراعظم آفس کے مطابق شامی وزیر خارجہ نے ڈپٹی وزیراعظم اور وزیر خارجہ اسحاق ڈار کی دعوت پر اسلام آباد کا یہ سرکاری دورہ کیا ہے، جو شام میں تبدیلیِ اقتدار کے بعد کسی بھی شامی وزیر خارجہ کا پہلا دورہ ہے۔ ملاقات میں دونوں رہنماؤں کے درمیان سیاسی، دفاعی، تجارت، سرمایہ کاری، تعلیم اور انسانی وسائل کی ترقی سمیت مختلف شعبوں میں تعلقات کو فروغ دینے پر تفصیلی تبادلہ خیال کیا گیا۔وزیراعظم شہباز شریف نے اس موقع پر شام کی خودمختاری، ارضی سالمیت اور اتحاد کے لیے پاکستان کی غیر متزلزل حمایت کا اعادہ کیا اور گولان کی پہاڑیوں سے متعلق شامی مؤقف کی بھرپور تائید کی۔ وزیراعظم نے دونوں ممالک کے درمیان براہ راست پروازوں کی بحالی کی ضرورت پر بھی زور دیا تاکہ عوام کے درمیان رابطے بہتر ہوسکیں اور پاکستان سے شام جانے والے زائرین کو سہولت فراہم کی جا سکے۔ شامی وزیر خارجہ اسعد حسن الشیبانی نے شامی صدر احمد الشراع کا خصوصی پیغام وزیراعظم تک پہنچایا اور ملک میں جاری عبارتی اور تعمیر نو کے عمل سے آگاہ کیا۔ شامی وزیر خارجہ نے مشکل وقت میں شام کا ساتھ دینے پر پاکستان کا شکریہ ادا کیا اور باہمی تعاون کے لیے ادارہ جاتی میکانزم کو جلد فعال کرنے میں گہری دلچسپی کا اظہار کیا۔ اس سے قبل، شامی وزیر خارجہ نے نائب وزیراعظم اور وزیر خارجہ اسحاق ڈار کے ساتھ وفد کی سطح پر مذاکرات بھی کیے جن میں خطے کی مجموعی صورتحال، فلسطین، گولان کی پہاڑیوں اور مشرق وسطیٰ کے امور پر تبادلہ خیال کیا گیا۔ دفتر خارجہ کے مطابق فریقین نے خطے میں امن، استحکام اور خوشحالی کے لیے مل کر کام کرنے کے عزم کا اظہار کیا۔