وزیراعظم شہباز شریف کی اپوزیشن کو مذاکرات کی پیشکش

اسلام آباد: وزیراعظم شہباز شریف نے ملک میں جاری سیاسی کشیدگی کو کم کرنے اور معاشی و جمہوری استحکام کو یقینی بنانے کے لیے اپوزیشن کو ایک بار پھر مذاکرات کی پیشکش کی ہے۔ وزیراعظم کا کہنا ہے کہ موجودہ حکومت اپوزیشن کے ساتھ تمام اہم قومی امور پر بامقصد اور معنی خیز بات چیت کے لیے مکمل طور پر تیار ہے تاکہ ملک کو درپیش چیلنجز سے نکالا جا سکے۔ مقامی میڈیا رپورٹس کے مطابق وزیرِاعظم نے اس عزم کا اعادہ کیا ہے کہ پاکستان کی ترقی اور عوامی فلاح کے لیے تمام سیاسی جماعتوں کو مل کر کام کرنا ہوگا۔ انہوں نے اس بات پر زور دیا کہ جمہوریت اور معیشت کی بہتری کے لیے باہمی تعاون ناگزیر ہے کیونکہ سیاسی استحکام کے بغیر معاشی ترقی کا ہدف حاصل نہیں کیا جا سکتا۔ دوسری جانب وفاقی کابینہ کے اجلاس میں تحریک انصاف کے بانی عمران خان کی اسپتال منتقلی کے امور اور ملک کی مجموعی سیکیورٹی صورتحال کا بھی تفصیلی جائزہ لیا جائے گا۔ مبصرین کا کہنا ہے کہ حکومت اور اپوزیشن کے درمیان بات چیت کا یہ نیا عندیہ ملکی سیاست میں مثبت تبدیلی کا پیش خیمہ ثابت ہو سکتا ہے، بشرطیکہ دونوں فریقین لچک کا مظاہرہ کریں۔ وزیراعظم نے واضع کیا کہ مسائل کا حل صرف اور صرف گفت و شنید میں پوشیدہ ہے اور حکومت اس سلسلے میں ہر ممکنہ قدم اٹھانے کے لیے تیار ہے۔