ہنگو چیک پوسٹ حملہ: ڈی ایس پی سمیت 9 پولیس اہلکار شہید، 15 دہشت گرد ہلاک

خیبر پختونخوا کے ضلع ہنگو میں دہشت گردوں نے ایک پولیس چیک پوسٹ کو نشانہ بنایا جس کے نتیجے میں ڈپٹی سپرنٹنڈنٹ آف پولیس (ڈی ایس پی) سمیت نو پولیس اہلکار شہید اور اٹھائیس افراد زخمی ہو گئے۔ صوبائی پولیس کے انسپکٹر جنرل (آئی جی) کی جانب سے جاری کردہ بیان کے مطابق ہنگو کے علاقے خزینہ بندہ میں قائم اس چیک پوسٹ پر کالعدم تحریک طالبان پاکستان سے وابستہ دہشت گردوں نے حملہ کیا۔ پولیس اہلکاروں نے اس حملے کا بہادری اور پیشہ ورانہ مہارت کے ساتھ مقابلہ کیا اور جب اضافی نفری طلب کی گئی تو حملہ آوروں نے گھات لگا کر حملہ کر دیا جس سے ایک اور گاڑی بھی متاثر ہوئی۔ اس شدید اور طویل فائرنگ کے تبادلے کے دوران پولیس کی بھرپور جوابی کارروائی میں پندرہ خارجی دہشت گرد ہلاک اور کئی دیگر زخمی بھی ہوئے ہیں۔ اس لرزہ خیز واقعے میں ڈی ایس پی دیار خان سمیت نو پولیس اہلکاروں نے جام شہادت نوش کیا جبکہ اٹھائیس جوان زخمی ہوئے جنہیں فوری طور پر ہسپتال منتقل کر دیا گیا۔ آئی جی خیبر پختونخوا نے اس عزم کا اعادہ کیا ہے کہ پولیس کے حوصلے بلند ہیں اور صوبے کے کونے کونے سے دہشت گردی کے خاتمے تک جنگ جاری رکھی جائے گی۔ دوسری جانب پشاور کے علاقے متنی میں بھی ایک پولیس چیک پوسٹ کو نشانہ بنایا گیا جہاں اہلکاروں کی بروقت اور مؤثر جوابی فائرنگ کے بعد حملہ آور فرار ہونے پر مجبور ہو گئے اور تمام پولیس اہلکار محفوظ رہے۔ اس المناک واقعے پر صدر مملکت آصف علی زرداری، وزیر اعظم شہباز شریف، وزیر داخلہ اور خیبر پختونخوا کے وزیر اعلیٰ سمیت اعلیٰ عسکری اور سیاسی شخصیات نے گہرے رنج و غم کا اظہار کیا ہے۔ وزیراعظم شہباز شریف نے شہید ہونے والے پولیس اہلکاروں کو خراج عقیدت پیش کرتے ہوئے کہا کہ پولیس نے ہمیشہ دہشت گردی کے خلاف جنگ میں ہ اول دستے کا کردار ادا کیا ہے۔ صدر مملکت نے شہداء کے لواحقین سے تعزیت کا اظہار کیا اور اس عزم کا اعادہ کیا کہ ملک دشمن عناصر اور ان کے سہولت کاروں کو ان کے انجام تک پہنچایا جائے گا۔ وزیر اعلیٰ خیبر پختونخوا نے واقعے کی تفصیلی رپورٹ طلب کرتے ہوئے زخمیوں کو بہترین طبی امداد فراہم کرنے کی ہدایت کی ہے۔ انہوں نے کہا کہ صوبے میں امن کا قیام اولین ترجیح ہے اور پولیس جوانوں کی قربانیوں کو رائیگاں نہیں جانے دیا جائے گا۔