پاکستان شام تعلقات: تجارت اور دفاعی تعاون بڑھانے پر اتفاق

اسلام آباد: پاکستان اور شام نے باہمی تعلقات کو نئی بلندیوں تک لے جانے اور روایتی دوستی کو عملی دوطرفہ تعاون میں تبدیل کرنے کے عزم کا اعادہ کیا ہے۔ وزیراعظم پاکستان شہباز شریف نے اس بات پر زور دیا ہے کہ دونوں ممالک کے درمیان طویل عرصے سے قائم دوستانہ تعلقات کو اب باضابطہ اور مضبوط تجارتی، دفاعی اور تعلیمی شراکت داری میں ڈھالنے کی ضرورت ہے تاکہ دونوں اقوام کے عوام مستفید ہو سکیں۔ عالمی ذرائع ابلاغ کے مطابق اس اہم سفارتی پیش رفت کے تسلسل میں شام کا ایک اعلیٰ سطحی سفارتی وفد اور وزیر خارجہ آئندہ دنوں میں پاکستان کا دورہ کرنے والے ہیں۔ پچھلے تقریبا دو دہائیوں میں کسی شامی اعلیٰ سفارت کار کا یہ پہلا پاکستان کا دورہ ہوگا، جسے خطے کی سیاست میں ایک بڑی پیش رفت قرار دیا جا رہا ہے۔ دورے کا مقصد دونوں ممالک کے مابین مختلف شعبوں میں تعاون کو وسعت دینا اور دوطرفہ تعلقات کو ادارہ جاتی شکل دینا ہے۔ خطے میں جاری کشیدگی اور تبدیل ہوتی ہوئی علاقائی صورتحال کے تناظر میں اس دورے کو انتہائی اہمیت کی نگاہ سے دیکھا جا رہا ہے۔ پاکستان کا مؤقف رہا ہے کہ مسلم ممالک کے ساتھ رابطوں کو مزید بڑھایا جائے اور باہمی چیلنجز سے نمٹنے کے لیے مشترکہ لائحہ عمل اپنایا جائے۔ توقع کی جا رہی ہے کہ اس دورے کے دوران تجارت، معیشت اور سکیورٹی کے امور پر اہم معاہدوں اور یاداشتوں پر غور کیا جائے گا، جس سے پاک شام تعلقات کا ایک نیا باب رقم ہوگا۔