سندھ میں اسکول اور کالج ہفتے میں 6 دن کھلیں گے

کراچی: سندھ حکومت نے جمعرات کے روز ایک اہم فیصلے کا اعلان کرتے ہوئے صوبے کے تمام اسکولوں اور کالجوں میں یکم اگست سے اگلے احکامات تک ہفتے میں چھ دن کلاسز منعقد کرنے کا فیصلہ کیا ہے۔ اس حوالے سے اسکول ایجوکیشن اینڈ لٹریسی ڈیپارٹمنٹ اور کالج ایجوکیشن ڈیپارٹمنٹ کی جانب سے دو الگ الگ نوٹیفیکیشن جاری کیے گئے ہیں، جن کے مطابق پیر سے ہفتے تک تمام سرکاری اور نجی تعلیمی ادارے کھلے رہیں گے۔ محکمہ اسکول ایجوکیشن کے نوٹیفیکیشن کے مطابق یہ فیصلہ 31 مارچ 2026 کے اس حکم نامے کی جگہ نافذ کیا گیا ہے جس میں ہفتہ اور اتوار کی چھٹیاں دی گئی تھیں۔ اسی طرح کالج ایجوکیشن ڈیپارٹمنٹ کی جانب سے جاری کردہ نوٹیفیکیشن کے تحت بھی تمام کالجوں میں پیر سے ہفتے تک تعلیمی سرگرمیاں جاری رکھنے کی ہدایت کی گئی ہے۔ کالجوں کے اوقات کار کے حوالے سے جاری کردہ تفصیلات کے مطابق مارننگ شفٹ میں پیر سے جمعرات اور ہفتے کے روز وقت صبح ساڑھے آٹھ بجے سے دوپہر ڈیڑھ بجے تک ہوگا، جبکہ جمعہ کے روز صبح ساڑھے آٹھ بجے سے ساڑھے گیارہ بجے تک کلاسز ہوں گی۔ ایوننگ شفٹ کے لیے اوقات کار سہ پہر تین بجے سے شام سات بجے تک پیر سے جمعرات اور ہفتے کے روز مقرر کیے گئے ہیں جبکہ جمعہ کے روز ایوننگ شفٹ دوپہر ڈھائی بجے سے شام پانچ بجے تک ہوگی۔ یاد رہے کہ رواں سال 31 مارچ کو سندھ حکومت نے ایندھن کی بچت اور معاشی صورتحال کے پیش نظر ہفتے اور اتوار کو تعلیمی اداروں میں تعطیل کا اعلان کیا تھا تاہم حکومت کے ترجمان کے مطابق اس فیصلے کے بعد طلباء کے ساتھ ساتھ اساتذہ بھی ہفتے کی چھٹی کرنے لگے تھے جس کی وجہ سے سالانہ نصاب کی تکمیل اور تعلیمی حرج کا سامنا کرنا پڑ رہا تھا۔ حکومت کا ماننا ہے کہ تعلیمی حرج کو روکنے اور بچوں کا مستقبل محفوظ بنانے کے لیے چھ دن کا ہفتہ بحাল کرنا ناگزیر ہو چکا تھا تاکہ تعلیمی سال کے دوران تمام نصابی سرگرمیاں وقت پر مکمل کی جا سکیں۔