پی ٹی آئی کا سپریم کورٹ کے حکم کی خلاف ورزی پر اظہارِ تشویش

پاکستان تحریک انصاف (پی ٹی آئی) نے بانی چیئرمین کے طبی معائنے سے متعلق سپریم کورٹ کے واضح احکامات کی مبینہ خلاف ورزی پر شدید غصے اور تشویش کا اظہار کیا ہے۔ پارٹی ذرائع اور رہنماؤں کے مطابق عدالت عظمیٰ کے احکامات میں کسی قسم کا کوئی ابہام نہیں تھا، اس کے باوجود ان پر من و عن عمل درآمد نہ کیا جانا قانون اور عدلیہ کے احترام کے منافی ہے۔ اس پورے معاملے پر تحریک انصاف کی قیادت نے سخت لاءائحہ عمل اپنانے کا عندیہ دیا ہے اور متعلقہ اداروں کے کردار پر سوالات اٹھائے ہیں۔پی ٹی آئی کے چیئرمین بیرسٹر گوہر خان نے اس پیش رفت کو انتہائی افسوسناک اور بدقسمتی سے تعبیر کیا ہے۔ ان کا کہنا ہے کہ عدالت عظمیٰ کی جانب سے بانی چیئرمین کے طبی معائنے اور ان کی صحت سے متعلق دی جانے والی ہدایات بالکل واضح تھیں، لیکن اس کے باوجود ان پر عملدرآمد میں رکاوٹیں ڈالی جا رہی ہیں۔ بیرسٹر گوہر نے مزید کہا کہ اس طرح کے اقدامات سے ملک میں کشیدگی بڑھتی ہے جبکہ سیاسی اور جمہوری ماحول کو بہتر بنانے کے لیے قانون کی حکمرانی کا قیام ناگزیر ہے۔انہوں نے اس عزم کا بھی اعادہ کیا کہ تحریک انصاف ملک میں تمام سنجیدہ مسائل کا حل آئینی اور سیاسی دائرہ کار میں رہتے ہوئے مذاکرات کے ذریعے چاہتی ہے۔ بیرسٹر گوہر کے مطابق پارٹی نے ہمیشہ جمہوری اقدار اور قانون کی بالادستی کو مقدم رکھا ہے، لیکن بنیادی حقوق کی پامالی اور عدلیہ کے احکامات کی خلاف ورزی کو خاموشی سے برداشت نہیں کیا جا سکتا۔ انہوں نے حکومت اور متعلقہ حکام سے مطالبہ کیا ہے کہ وہ فوری طور پر سپریم کورٹ کے احکامات پر عمل درآمد کو یقینی بنائیں اور بانی چیئرمین کے طبی معائنے کے معاملات کو سیاسی انتقام سے بالاتر ہو کر حل کریں۔