بلوچستان کی صورتحال پر فیلڈ مارشل عاصم منیر کا اہم بیان

چیف آف ڈیفنس فورسز (سی ڈی ایف) اور آرمی چیف فیلڈ مارشل عاصم منیر نے کہا ہے کہ بیرونی عناصر کی جانب سے بلوچستان کو غیر مستحکم کرنے، اس کی ترقی میں رخنہ ڈالنے اور ریاست اور عوام کے درمیان خلیج حائل کرنے کے لیے غیر ملکی حمایت یافتہ پراکسیز کا استعمال کیا جا رہا ہے۔ پاک فوج کے شعبہ تعلقات عامہ (آئی ایس پی آر) کے مطابق، انہوں نے یہ ریمارکس بلوچستان کی سیاسی قیادت سے ملاقات کے دوران دیے۔ اس موقع پر فیلڈ مارشل عاصم منیر نے اس بات پر زور دیا کہ بلوچستان اور پاکستان کا حال اور مستقبل ایک ہے اور ہمیشہ رہے گا۔ انہوں نے اس عزم کا اظہار کیا کہ صوبے میں پائیدار امن، ترقی اور قومی بیانیہ ہی معاشی صلاحیتوں کو اجاگر کرنے کے لیے بنیادی حیثیت رکھتا ہے۔ ملاقات میں نوجوانوں کے کردار پر بات کرتے ہوئے سی ڈی ایف نے کہا کہ بلوچستان کے نوجوان معاشرے کا انتہائی روشن اور فعال حصہ ہیں جن میں صلاحیتوں کی کوئی کمی نہیں۔ انہوں نے اس بات پر زور دیا کہ نوجوانوں کو بااختیار بنانا اور انہیں قومی ترقی میں حصہ ڈالنے کے مواقع فراہم کرنا پائیدار ترقی کے لیے مرکزی حیثیت رکھتا ہے۔ فیلڈ مارشل عاصم منیر نے مزید کہا کہ 'فتنہ الخوارج' اور 'فتنہ الہندستان' بیرونی حمایت یافتہ پراکسیز ہیں جنہیں دشمن عناصر صوبے کو کمزور کرنے کے لیے استعمال کر رہے ہیں۔ انہوں نے عزم ظاہر کیا کہ ان مذموم عزائم کو پوری قوم کے اجتماعی عزم اور ریاست کے دوٹوک اور فیصلہ کن ردعمل سے ناکام بنایا جائے گا۔ آئی ایس پی آر کے مطابق، آرمی چیف نے صوبے میں امن کے فروغ، سماجی ہم آہنگی کو مضبوط کرنے اور تعمیری قومی مکالمے کو آگے بڑھانے میں بلوچستان کے عمائدین اور رہنماؤں کے کردار کو سراہا۔ انہوں نے اس بات کی ضرورت پر زور دیا کہ دشمن کے پروپیگنڈے کا مؤثر طریقے سے مقابلہ کیا جائے، جھوٹے بیانیے بے نقاب کیے جائیں اور بلوچستان کے عوام کی اصل امنگوں کو سامنے لایا جائے۔ اجلاس کے شرکاء نے بھی امن اور ترقی کے لیے ریاست اور سکیورٹی فورسز کے ساتھ شانہ بشانہ کھڑے رہنے کا پختہ عزم ظاہر کیا۔