نادرا کا پنشنرز کے لیے بڑا اقدام، لائف سرٹیفکیٹ مفت قرار

اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے پنشنرز کی سہولت کے لیے ایک اہم قدم اٹھاتے ہوئے پروف آف لائف سرٹیفکیٹ (PoLC) کو بالکل مفت کر دیا ہے اور ملک بھر میں اس تک رسائی کے ذرائع کو نمایاں طور پر بڑھا دیا ہے۔ جمعہ کو شروع کی جانے والی اس نئی اور فلاحی پہل کا مقصد پنشنرز کو درپیش مشکلات کا خاتمہ کرنا ہے، جو وزیراعظم شہباز شریف کی خصوصی ہدایات پر وزارت داخلہ، وزارت دفاع، کنٹرولر جنرل آف اکاؤنٹس (CGA) اور ملٹری اکاؤنٹنٹ جنرل (MAG) کے اشتراک سے عمل میں لائی گئی ہے۔ پروف آف لائف سرٹیفکیٹ ایک ایسا سرکاری دستاویز ہے جو اس بات کی تصدیق کرتا ہے کہ پنشنر حیات ہے۔ نادرا کے مطابق اس عمل کو انتہائی آسان بناتے ہوئے اب پنشنرز گھر بیٹھے پاک آئی ڈی موبائل ایپلیکیشن کے ذریعے ڈیجیٹل طور پر یہ سرٹیفکیٹ حاصل کر سکتے ہیں۔ اس کے علاوہ خاندان کا کوئی بھی قریبی فرد مقررہ تصدیقی عمل کو پورا کرنے کے بعد اپنے پاک آئی ڈی اکاؤنٹ کے ذریعے بھی متعلقہ پنشنر کے لیے یہ سرٹیفکیٹ حاصل کرنے کا مجاز ہوگا۔ جو پنشنرز ڈیجیٹل ذرائع کے بجائے روایتی خدمات کو ترجیح دیتے ہیں، ان کے لیے ملک بھر میں قائم پانچ ہزار سے زائد ای سہولت فرنچائزز پر یہ سرٹیفکیٹ بالکل مفت دستیاب ہوگا۔ اس کے علاوہ 988 سے زائد نادرا رجسٹریشن سینٹرز اور 500 یونین کونسلوں میں بھی پنشنرز کو ترجیحی بنیادوں پر بغیر طویل قطاروں میں کھڑے ہوئے یہ سہولت فراہم کی جا رہی ہے۔ وہ بزرگ یا معذور پنشنرز جو کسی بھی وجہ سے ان مراکز تک جانے سے قاصر ہیں، ان کے لیے موبائل رجسٹریشن وینز، موٹر سائیکل سروسز اور مین پیک رجسٹریشن سروسز کے ذریعے گھر کی دہلیز پر بھی سہولت مہیا کی جارہی ہے۔ یہ اقدام نادرا کی طرف سے قائم کردہ نیشنل پنشنرز رجسٹر کے وسیع تر اصلاحاتی پروگرام کا حصہ ہے، جس کے پہلے مرحلے میں سی جی اے اور ایم اے جی کے تحت آنے والے پنشنرز کو ڈیجیٹل نظام میں شامل کیا گیا ہے۔ اس نئے نظام کے ذریعے اب فوتگی یا بنیادی تفصیلات میں تبدیلی کی صورت میں متعلقہ پنشن اداروں کو روزانہ کی بنیاد پر ڈیجیٹل اطلاعات موصول ہوں گی، جس سے کاغذی کارروائی اور بار بار کی جسمانی تصدیق کی زحمت سے نجات ملے گی۔