اسکولوں میں ڈیجیٹل ٹیکنالوجی پر پابندی کا نیا بل متعارف

امریکہ کی ریاست نیویارک کے اسکولوں میں تعلیم کا پرانا انداز واپس لانے کی تیاریاں شروع ہو گئی ہیں، جہاں ایک نئے بل کے ذریعے کلاس رومز میں ٹیکنالوجی اور اسمارٹ فونز کے استعمال کو محدود کرنے کی تجویز پیش کی گئی ہے۔ اگر یہ قانون منظور ہو جاتا ہے تو طلباء کو ڈیجیٹل اسکرینز سے ہٹا کر ایک بار پھر نوٹ بک، پنسل اور روایتی کتابوں کی طرف لایا جائے گا۔ ماہرین تعلیم کا کہنا ہے کہ ڈیجیٹل آلات بچوں کی توجہ ہٹانے اور ان کی ذہنی صحت پر منفی اثرات مرتب کرنے کی بڑی وجہ بن رہے ہیں۔ اس نئے بل کی تیاری میں اہم کردار ادا کرنے والے ریاستی سینیٹر اینڈریو گونارڈس کا ماننا ہے کہ طلباء کو اسکرین کے مسلسل استعمال سے نجات دلانا وقت کی اہم ضرورت ہے۔ ان کا کہنا ہے کہ کلاسرومز میں ڈیجیٹل ڈیوائسز کی بھرمار نے بچوں کی سیکھنے کی صلاحیت اور آپس میں بات چیت کرنے کے ہنر کو متاثر کیا ہے۔ مجوزہ قانون کے تحت تعلیمی اداروں میں ایسے سخت ضابطے نافذ کیے جائیں گے جو طلباء کو دورانِ تعلیم اسمارٹ فونز اور دیگر غیر ضروری ڈیجیٹل گیجٹس کے استعمال سے روک سکیں۔ والدین اور اساتذہ کی ایک بڑی تعداد اس اقدام کو سراہ رہی ہے، کیونکہ ان کا تجربہ ہے کہ اسمارٹ فونز کے اسکولوں میں داخلے کے بعد سے بچوں کی پڑھائی میں دلچسپی کم اور سوشل میڈیا کی طرف رغبت زیادہ ہو گئی ہے۔ پرانے دور کے روایتی طریقہ تدریس، یعنی کاپی اور پینسل کے استعمال سے بچوں میں لکھنے کی صلاحیت اور توجہ مرکوز کرنے کی عادت بہتر ہوتی ہے۔ اس بل کے حامیوں کو امید ہے کہ اس سے نہ صرف تعلیمی معیار بلند ہوگا بلکہ بچوں کا اسکرین ٹائم بھی کم ہو سکے گا۔ تاہم، اس بل کو نافذ کرنے کے حوالے سے کچھ چیلنجز بھی سامنے آ رہے ہیں، جن میں اسکول انتظامیہ اور والدین کے درمیان آراء کا اختلاف شامل ہے۔ بعض حلقوں کا خیال ہے کہ جدید دور میں ٹیکنالوجی کو مکمل طور پر نظر انداز نہیں کیا جا سکتا کیونکہ مستقبل کی نوکریاں ڈیجیٹل مہارتوں پر منحصر ہیں۔ اس کے باوجود، قانون ساز اس بات پر بضد ہیں کہ بنیادی تعلیم کے حصول کے دوران طلبا کو ڈیجیٹل مداخلت سے پاک ماحول فراہم کرنا ناگزیر ہے تاکہ وہ اپنی پڑھائی پر مکمل توجہ مرکوز رکھ سکیں۔