پاکستان اور ملائیشیا کا دہشت گردی کے خلاف تعاون پر اتفاق

اسلام آباد میں پاکستان اور ملائیشیا کے درمیان دوطرفہ تعلقات کو مزید فروغ دینے اور سیکیورٹی تعاون کو وسعت دینے کے حوالے سے ایک انتہائی اہم ملاقات منعقد ہوئی۔ وفاقی وزیر داخلہ محسن نقوی اور ملائیشیا کے وزیر داخلہ سیف الدین ناسوشن کے درمیان ہونے والی اس ملاقات میں خطے کی مجموعی سیکیورٹی صورتحال اور باہمی دلچسپی کے امور پر تفصیلی تبادلہ خیال کیا گیا۔ دونوں رہنماؤں نے اس بات پر زور دیا کہ دہشت گردی اور غیر قانونی انسانی اسمگلنگ جیسے سنگین چیلنجز سے نمٹنے کے لیے دونوں برادر ممالک کو مل کر لائحہ عمل تیار کرنا ہوگا۔ ملاقات کے دوران اس عزم کا اعادہ کیا گیا کہ دونوں ممالک کے درمیان انٹیلی جنس شیئرنگ کے نظام کو مزید موثر بنایا جائے گا تاکہ جرائم پیشہ عناصر اور انسانی اسمگلنگ میں ملوث نیٹ ورکس کے خلاف بروقت اور سخت کارروائی عمل میں لائی جا سکے۔ وزیر داخلہ محسن نقوی نے اس موقع پر کہا کہ پاکستان ملائیشیا کے ساتھ اپنے تاریخی اور دوستانہ تعلقات کو انتہائی اہمیت دیتا ہے اور دہشت گردی کے ناسور کو جڑ سے اکھاڑ پھینکنے کے لیے تمام دستیاب وسائل بروئے کار لائے جا رہے ہیں۔ ملائیشیا کے وزیر داخلہ نے بھی اس عزم کی تائید کرتے ہوئے دوطرفہ سیکیورٹی تعاون کو اگلے درجے تک لے جانے میں گہری دلچسپی کا اظہار کیا۔ اس اعلیٰ سطح کے اجلاس میں سیکیورٹی امور کے علاوہ سیاحت کے فروغ اور وزا کی سہولیات میں بہتری کے امور پر بھی سیرحاصل گفتگو کی گئی۔ پاکستان نے ملائیشیا سے درخواست کی ہے کہ پاکستانی شہریوں کے لیے ورک کوٹاس میں اضافہ کیا جائے تاکہ ہنر مند افراد قانونی طریقے سے روزگار کے حصول کے لیے ملائیشیا جا سکیں۔ دونوں وزراء نے اس بات پر اتفاق کیا کہ ویزا کے طریقہ کار کو مزید آسان بنانے سے دونوں ممالک کے عوام کے درمیان رابطے بڑھیں گے اور تجارتی و ثقافتی تعلقات کو بھی نئی تقویت ملے گی۔