ڈیاگو میراڈونا کا ہینڈ آف گاڈ فٹبال نیلامی میں فروخت

فٹبال کی تاریخ کے سب سے متنازع اور یادگار لمحات میں سے ایک سے وابستہ گیند بالآخر نیلام کر دی گئی ہے۔ یہ وہی مشہور فٹبال ہے جس کی مدد سے ارجنٹائن کے لیجنڈری کھلاڑی ڈیاگو میراڈونا نے 1986 کے فیفا ورلڈ کپ کے کوارٹر فائنل میں انگلینڈ کے خلاف تاریخی 'ہینڈ آف گاڈ' گول اسکور کیا تھا۔ اس گیند کو نیلامی میں پچیس لاکھ برطانوی پاؤنڈ میں فروخت کیا گیا ہے، جو کہ فٹبال کی شائقین اور کھیلوں کی تاریخ سے محبت کرنے والوں کے لیے ایک بہت بڑی خبر ہے۔ یاد رہے کہ یہ میچ فٹبال کی تاریخ کے سنسنی خیز ترین مقابلوں میں شمار ہوتا ہے۔ میکسیکو میں کھیلے گئے اس میچ کے دوران ڈیاگو میراڈونا نے اپنے ہاتھ سے گیند کو جال میں پہنچایا تھا، جسے ریفری اس وقت دیکھنے میں ناکام رہے اور گول تسلیم کر لیا گیا۔ میچ کے بعد میراڈونا نے اس متنازع گول کے بارے میں مشہور جملہ کہا تھا کہ یہ کچھ میراڈونا کے سر اور کچھ خدا کے ہاتھ سے کیا گیا تھا۔ اسی میچ میں میراڈونا نے ایک اور گول بھی کیا تھا جسے صدی کا بہترین انفرادی گول مانا جاتا ہے، جس میں انہوں نے اکیلے ہی انگلینڈ کے کئی کھلاڑیوں کو چکمہ دے کر گیند کو گول پوسٹ تک پہنچایا تھا۔ ارجنٹائن نے اس میچ میں انگلینڈ کو دو کے مقابلے ایک گول سے شکست دی تھی اور بعد میں ٹرافی بھی اپنے نام کی تھی۔ اس تاریخی فٹبال کو بیچنے کا فیصلہ اس وقت کے میچ ریفری علی بن ناصر نے کیا تھا، جنہوں نے میچ کے بعد یہ گیند اپنے پاس محفوظ رکھ لی تھی۔ اگرچہ اس فٹبال کی متوقع قیمت تیس لاکھ سے پچیس لاکھ پاؤنڈ کے درمیان لگائی جا رہی تھی، لیکن بالآخر پچیس لاکھ پاؤنڈ میں اس کی فروخت نے کھیلوں کی یادگار اشیاء کی مارکیٹ میں ایک بار پھر ہلچل مچا دی ہے۔ فٹبال کے پرستار آج بھی اس واقعے کو کھیل کی تاریخ کا سب سے بڑا تنازع اور جادوئی لمحہ قرار دیتے ہیں۔