وزیراعظم مودی کا بھارت کو اسپیس ٹیکنالوجی کا عالمی ہب بنانے پر زور

نئی دہلی میں وزیر اعظم نریندر مودی نے ملک کے سرکردہ خلائی اسٹارٹ اپس کے بانیوں اور چیف ایگزیکٹو افسران سے ایک اہم ملاقات کی ہے۔ اس ملاقات کے دوران انہوں نے اس بات پر زور دیا کہ نجی شعبے کو خلائی تحقیق اور ٹیکنالوجی کے میدان میں مزید آگے لایا جائے تاکہ دنیا بھر کے نوجوانوں اور ماہرین کو یہ احساس ہو سکے کہ اگر انہیں اپنے کیریئر میں آگے بڑھنا ہے تو بھارت ان کے لیے بہترین منزل ہے۔ وزیر اعظم نے کہا کہ حکومت نجی کمپنیوں اور اسٹارٹ اپس کو ہر ممکن تعاون فراہم کرنے کے لیے پرعزم ہے۔ ان کا کہنا تھا کہ بھارت میں ٹیلنٹ اور جدت طرازی کی کوئی کمی نہیں ہے، ضرورت اس امر کی ہے کہ ہم روایتی طریقوں سے ہٹ کر نئے اور انقلابی خیالات کو عملی جامہ پہنائیں تاکہ عالمی سطح پر ملک کا نام روشن کیا جا سکے۔ ملاقات میں شریک مختلف اسپارٹ اپس کے سی ای اوز نے وزیر اعظم کے اس ویژن کی بھرپور تحسین کی اور خلائی شعبے میں حکومتی اصلاحات کو سراہا۔ انہوں نے یقین دلایا کہ ان کی کمپنیاں ملک میں ہی جدید ٹیکنالوجی تیار کرنے اور عالمی سطح پر مسابقت پیدا کرنے کے لیے دن رات محنت کر رہی ہیں۔ ماہرین کا ماننا ہے کہ وزیر اعظم کے ان بیانات سے بھارت کی نجی خلائی صنعت کو ایک نئی سمت ملے گی اور ملک جلد ہی دنیا بھر کے لیے خلائی تحقیق اور ٹیکنالوجی کا ایک بڑا مرکز بن کر ابھرے گا۔ اس سے نہ صرف ملکی معیشت کو استحکام ملے گا بلکہ روزگار کے نئے مواقع بھی پیدا ہوں گے۔