اینڈویا سرورز کی قیمتوں میں اضافہ، اے آئی انفراسٹرکچر مہنگا

ٹیکنالوجی کی دنیا کی معروف ترین کمپنی اینڈویا کو ایک نئے میموری بحران کا سامنا کرنا پڑ رہا ہے جس کی وجہ سے مصنوعی ذہانت یعنی اے آئی کے سرورز کی قیمتوں میں پندرہ فیصد سے زائد اضافے کا امکان ظاہر کیا گیا ہے۔ دنیا بھر میں آرٹیفیشل انٹیلی جنس کے بنیادی ڈھانچے کی لاگت مسلسل بڑھ رہی ہے اور میموری چپس کی قلت اور مہنگائی نے اس بحران کو مزید گہرا کر دیا ہے۔ ماہرین کا ماننا ہے کہ اس اقدام سے دنیا بھر میں پہلے ہی انتہائی مہنگے سمجھے جانے والے ڈیٹا سینٹر کے منصوبے اب مزید مہنگے ہو جائیں گے جس سے بڑی ٹیکنالوجی کمپنیوں کے مالیاتی تخمینے متاثر ہوں گے۔ اس پیشرفت کے بعد بڑی ٹیک کمپنیاں اب اپنے اخراجات کو کنٹرول کرنے اور متبادل ذرائع تلاش کرنے کے لیے سنجیدہ حکمت عملی پر غور کر رہی ہیں۔ مبصرین کا خیال ہے کہ اس قیمت کے اضافے سے نہ صرف اینڈویا کے کاروبار پر اثر پڑے گا بلکہ مجموعی طور پر عالمی اے آئی انڈسٹری کی ترقی کی رفتار بھی سست ہوسکتی ہے کیونکہ چھوٹے اور درمیانے درجے کے ادارے اتنی زیادہ لاگت برداشت کرنے کی سکت نہیں رکھتے۔ اس صورتحال کے تناظر میں، ٹیکنالوجی کے شعبے کے ماہرین کا کہنا ہے کہ آنے والے مہینوں میں ہارڈویئر کی مارکیٹ میں مزید اتھل پتھل دیکھنے کو مل سکتی ہے کیونکہ سپلائی چین کے مسائل اور طلب میں عدم توازن تاحال برقرار ہے۔