اسحاق ڈار کا آئی ایم او چیف سے رابطہ، پاکستانی ملاحوں کی رہائی کا مطالبہ

نائب وزیراعظم اور وزیر خارجہ سینیٹر اسحاق ڈار نے اپنے سرکاری دورہ برطانیہ کے دوران انٹرنیشنل میری ٹائم آرگنائزیشن (IMO) کے سربراہ سے ایک اہم ملاقات کی۔ اس اعلیٰ سطحی ملاقات میں دوطرفہ امور اور سمندری امور سے متعلق اہم چیلنجز پر تفصیلی تبادلہ خیال کیا گیا، جبکہ خطے میں میری ٹائم سیکیورٹی کی صورتحال کا بھی جائزہ لیا گیا۔ ملاقات کے دوران نائب وزیراعظم نے صومالی قزاقوں کے قبضے میں موجود پاکستانی ملاحوں کی رہائی کا معاملہ انتہائی سنجیدگی سے اٹھایا۔ اسحاق ڈار نے عالمی سمندری ادارے کے سربراہ پر واضح کیا کہ صومالی قزاقوں کی قید میں موجود پاکستانی شہریوں اور ملاحوں کی زندگیاں خطرے میں ہیں اور ان کی بحفاظت واپسی کے لیے فوری اور مؤثر اقدامات ناگزیر ہیں۔ انہوں نے اس بات پر زور دیا کہ بین الاقوامی سطح پر اس بحران کے حل کے لیے ہنگامی مداخلت کی ضرورت ہے تاکہ ان بے گناہ ملاحوں کو جلد از جلد بازیاب کرا کے ان کے اہل خانہ تک پہنچایا جا سکے۔ دفتر خارجہ کے جاری کردہ بیان کے مطابق، نائب وزیراعظم اسحاق ڈار اپنے اس دورہ برطانیہ کے دوران متعدد اہم سفارتی مصروفیات میں حصہ لے رہے ہیں، جن میں آنے والے دنوں میں پاکستان میں ہونے والے اہم سفارتی تقریبات کی تیاریاں بھی شامل ہیں۔ برطانوی دارالحکومت میں ان کی اس ملاقات کو سفارتی حلقوں میں انتہائی اہمیت کی نگاہ سے دیکھا جا رہا ہے، کیونکہ اس سے پاکستان کے سمندری حقوق اور شہریوں کے تحفظ کے عزم کو مزید تقویت ملی ہے۔ حکومتِ پاکستان اپنے شہریوں کی حفاظت کو اولین ترجیح دیتی ہے اور اس سلسلے میں بین الاقوامی اداروں کے ساتھ مسلسل رابطے میں ہے۔ اسحاق ڈار کی جانب سے آئی ایم او کے سربراہ سے اس معاملے پر بات چیت کے بعد امید کی جا رہی ہے کہ صومالی قزاقوں کے زیر حراست پاکستانی ملاحوں کی بازیابی کے لیے عالمی سطح پر دباؤ میں اضافہ ہوگا اور وہ جلد اپنے وطن واپس پہنچ سکیں گے۔