ڈیائن ایبٹ کی لیبر پارٹی میں واپسی، معطلی ختم

برطانیہ کی سینئر اور معروف بائیں بازو کی رکن پارلیمنٹ ڈیائن ایبٹ کو تقریباََ ایک سال کی معطلی کے بعد بالآخر لیبر پارٹی میں دوبارہ بحال کر دیا گیا ہے۔ اس فیصلے کے بعد اب ان کی پارٹی کی رکنیت بحال ہو چکی ہے اور وہ آئندہ ہونے والے عام انتخابات میں باضابطہ طور پر لیبر پارٹی کے پلیٹ فارم سے حصہ لینے کے لیے بھی اہل قرار پا گئی ہیں۔ ڈیائن ایبٹ کو گزشتہ سال اس وقت معطل کیا گیا جب انہوں نے نسل پرستی سے متعلق کچھ ایسے متنازعہ بیانات دیے تھے جن پر پارٹی کے اندر شدید تحفظات کا اظہار کیا گیا تھا۔ ان بیانات کے بعد ان کے خلاف اندرونی انکوائری شروع کی گئی تھی اور انہیں پارٹی کی پارلیمانی پارٹی سے باہر کر دیا گیا تھا جس سے سیاسی حلقوں میں ایک طوفان کھڑا ہو گیا تھا۔ ڈیائن ایبٹ برطانوی تاریخ میں پارلیمنٹ میں منتخب ہونے والی پہلی سیاہ فام خاتون ہیں اور برطانوی سیاست میں ان کا ایک طویل اور نمایاں سیاسی کریئر رہا ہے۔ ان کی معطلی کے خاتمے کو سیاسی تجزیہ کاروں کی طرف سے ایک اہم پیش رفت قرار دیا جا رہا ہے، خاص طور پر ایسے وقت میں جب ملک میں انتخابی سرگرمیاں عروج پر ہیں اور تمام سیاسی جماعتیں اپنے صفوں کو مضبوط کرنے میں مصروف ہیں۔ لیبر پارٹی کے اس فیصلے کا پارٹی کے اندر اور باہر مختلف حلقوں کی طرف سے خیرمقدم کیا جا رہا ہے، جس سے پارٹی کی اندرونی صف بندی میں بھی بہتری آنے کی توقع کی جا رہی ہے۔