امریکہ ایران کشیدگی، پاسداران انقلاب کا کویت میں امریکی اہداف پر حملہ

مشرق وسطیٰ میں جاری کشیدگی میں ایک خطرناک موڑ اس وقت آیا جب ایران کے پاسداران انقلاب (آئی آر جی سی) نے کویت میں امریکی اہداف کو نشانہ بنانے کا دعویٰ کیا۔ بین الاقوامی میڈیا رپورٹس کے مطابق یہ کارروائی امریکہ کی جانب سے ایران پر کیے جانے والے شدید جوابی حملوں کے ٹھیک ایک دن بعد سامنے آئی ہے، جس سے خطے میں ایک نئی جنگ کے خدشات شدت اختیار کر گئے ہیں۔ اس سے قبل امریکی فوج نے اپنے دستوں پر ہونے والے مبینہ حملے کے بعد ایران کے اندر متعدد مقامات پر بھاری بمباری کی تھی۔ امریکی حکام اور میڈیا ہاؤسز کی رپورٹس کے مطابق، خطے میں موجود امریکی فوجی اڈوں کو ہائی الرٹ کر دیا گیا ہے جبکہ سکیورٹی خدات کے پیش نظر اہم تنصیبات کی حفاظت مزید سخت کر دی گئی ہے۔ دوسری جانب کویت میں امریکی فضائی اڈے پر حملے کے حوالے سے اطلاعات متضاد ہیں۔ جہاں ایک طرف ایرانی پاسداران انقلاب اسے ایک کامیاب انتقامی کارروائی قرار دے رہے ہیں، وہیں امریکی ذرائع کا کہنا ہے کہ تازہ ترین حملوں میں کسی بھی بڑے نقصان یا جانی نقصان کی کوئی اطلاع نہیں ملی ہے۔ صورتحال کی سنگینی کو دیکھتے ہوئے عالمی رہنماؤں نے دونوں ممالک سے تحمل کا مظاہرہ کرنے کی اپیل کی ہے تاکہ خطے کو ایک اور بڑی جنگ سے بچایا جا سکے، تاہم زمینی حقائق یہ ظاہر کرتے ہیں کہ آنے والے دنوں میں کشیدگی میں مزید اضافہ ہو سکتا ہے۔