محسن نقوی کا تاجروں کو محفوظ ماحول دینے کا اعلان

وفاقی وزیر داخلہ محسن نقوی نے کہا ہے کہ حکومت کاروباری برادری کے تحفظ اور فلاح و بہبود کے لیے پرعزم ہے اور ملک بھر کے تاجروں کو ایک پُرامن اور محفوظ ماحول فراہم کیا جائے گا۔ خیبر پختونخوا اور بلوچستان سے تعلق رکھنے والے تاجروں کے ایک وفد سے گفتگو کرتے ہوئے انہوں نے اس بات پر زور دیا کہ ملکی معیشت کی ترقی میں تاجر برادری کا کردار انتہائی اہمیت کا حامل ہے، اس لیے ان کے تحفظ کو یقینی بنانا حکومت کی اولین ترجیحات میں شامل ہے۔ انہوں نے واضح کیا کہ تاجروں کو درپیش مسائل کو ترجیحی بنیادوں پر حل کیا جائے گا تاکہ وہ بغیر کسی خوف کے اپنی کاروباری سرگرمیاں جاری رکھ سکیں۔ اس ملاقات کے دوران ملک کی مجموعی سکیورٹی صورتحال اور بالخصوص تجارتی مراکز کے تحفظ کے حوالے سے تفصیلی تبادلہ خیال کیا گیا۔ وفد کے اکان نے وزیر داخلہ کو اپنے درپیش چیلنجز سے آگاہ کیا، جس پر محسن نقوی نے متعلقہ حکام کو فوری اقدامات اٹھانے کی ہدایات جاری کیں۔ دوسری جانب، حکومت کی جانب سے ملک میں دہشت گردی کے خلاف جاری کوششوں کو مزید تیز کرنے کا فیصلہ کیا گیا ہے تاکہ تمام صوبوں بالخصوص بلوچستان اور خیبر پختونخوا میں پائیدار امن قائم کیا جا سکے۔ سکیورٹی فورسز کے ساتھ مل کر دہشت گردوں کے خلاف موثر حکمت عملی پر عمل پیرا ہونے کا عزم ظاہر کیا گیا ہے، جس سے ملک میں سرمایہ کاری کا ماحول بھی بہتر ہوگا۔ وزیر داخلہ نے اس عزم کا اعادہ کیا کہ ریاست کسی بھی عناصر کو امن و امان کی صورتحال خراب کرنے کی اجازت نہیں دے گی اور تاجروں کے جان و مال کا تحفظ ہر قیمت پر یقینی بنایا جائے گا۔