محسن نقوی کی خیبرپختونخوا اور بلوچستان کے تاجروں سے ملاقات، سکیورٹی اور مسائل پر گفتگو

وفاقی وزیر داخلہ محسن نقوی نے خیبرپختونخوا اور بلوچستان سے تعلق رکھنے والے تاجروں اور صنعت کاروں کے ایک اہم وفد سے ملاقات کی ہے۔ وزارت داخلہ کے مطابق اس ملاقات میں تاجر برادری کو یقین دہانی کرائی گئی ہے کہ حکومت تمام دستیاب وسائل بروئے کار لاتے ہوئے ان کے مسائل حل کرے گی اور ان کے مکمل تحفظ کو یقینی بنائے گی۔ وزارت کی جانب سے جاری کردہ بیان میں بتایا گیا کہ دونوں صوبوں کے چیمبرز آف کامرس کے نمائندگان نے اپنے اپنے علاقوں کی سکیورٹی صورتحال اور درپیش چیلنجز پر تفصیلی روشنی ڈالی۔ ملاقات کے دوران وزیر داخلہ محسن نقوی نے ملک بالخصوص خیبرپختونخوا اور بلوچستان میں مجموعی امن و امان کی صورتحال اور اس حوالے سے حکومت کی طرف سے اٹھائے جانے والے اقدامات سے وفد کو آگاہ کیا۔ انہوں نے تاجر برادری کو مکمل تعاون کی یقین دہانی کراتے ہوئے کہا کہ حکومت تاجروں اور صنعت کاروں کے مسائل کے حل اور ان کے تحفظ کے لیے کوئی کسر نہیں چھوڑے گی۔ محسن نقوی نے اعلان کیا کہ وہ بہت جلد پشاور اور کوئٹہ کا دورہ کریں گے جہاں وہ اعلیٰ سرکاری حکام اور تاجر نمائندگان کی موجودگی میں تفصیلی ملاقاتیں کریں گے تاکہ تاجر برادری کو درپیش مسائل کا مستقل اور عملی حل نکالا جا سکے۔ ان کا مزید کہنا تھا کہ ملک کی معیشت کے استحکام میں نجی شعبہ ریڑھ کی ہڈی کی حیثیت رکھتا ہے اور پاکستان کی ترقی دراصل تاجر برادری کی ترقی سے جڑی ہوئی ہے۔ حکومت تاجروں کے ساتھ ہے اور ان کے تمام جائز مسائل ترجیحی بنیادوں پر حل کیے جائیں گے۔ یاد رہے کہ محسن نقوی کی یہ ملاقات دونوں صوبوں میں بڑھتے ہوئے سکیورٹی چیلنجز کے پس منظر میں سامنے آئی ہے۔ اس سے قبل صدر مملکت آصف علی زرداری سے ملاقات میں بھی وزیر داخلہ نے ملک بالخصوص خیبرپختونخوا اور بلوچستان کی امن و امان کی صورتحال پر تفصیلی تبادلہ خیال کیا تھا اور دہشت گردی کے خلاف جاری اقدامات سے صدر کو آگاہ کیا تھا۔ حکومت کی جانب سے امن و امان کے قیام اور کاروباری طبقے کے اعتماد کو بحال رکھنے کے لیے تمام ممکنہ اقدامات کیے جا رہے ہیں تاکہ معاشی سرگرمیاں بلا تعطل جاری رہ سکیں۔