وزیر اعظم قرض سکیم: ہاؤسنگ فنانس میں 94 فیصد اضافہ

وفاقی حکومت کی جانب سے شروع کی گئی وزیر اعظم ہاؤسنگ لون سکیم کے تحت ملک بھر میں ہاؤسنگ فنانس میں 94 فیصد کا نمایاں اضافہ ریکارڈ کیا گیا ہے۔ اس اہم پیشرفت کا انکشاف فنانس ڈویژن میں منعقدہ ایکسس ٹو فنانس اسٹیئرنگ کمیٹی کے اجلاس کے دوران کیا گیا، جس کی صدارت وفاقی وزیر برائے خزانہ و ریونیو سینیٹر محمد اورنگزیب نے کی۔ حکام کے مطابق اس اسکیم کے تحت عوام کو اپنے گھر کی تعمیر یا خریداری کے لیے آسان اقساط پر قرضے فراہم کیے جا رہے ہیں، جس سے تعمیراتی شعبے میں ایک نئی جان پڑ گئی ہے۔ اعداد و شمار کے مطابق وزیراعظم کے 'اپنا گھر' ہاؤسنگ منصوبے کے لیے درخواست دہندگان کی تعداد میں بھی 52 فیصد تک اضافہ دیکھا گیا ہے، جو اس اسکیم کی مقبولیت اور عوامی ضرورت کا منہ بولتا ثبوت ہے۔ اجلاس کے دوران وفاقی وزیر خزانہ محمد اورنگزیب نے اس بات پر زور دیا کہ حکومت ملک میں پائیدار معاشی استحکام لانے کے لیے پرعزم ہے۔ انہوں نے کہا کہ بین الاقوامی مالیاتی فنڈ (IMF) کے ساتھ ہونے والے معاہدے پر سختی سے عمل درآمد اور ملک میں وسیع پیمانے پر ٹیکس اصلاحات کا نفاذ معیشت کو اپنے پاؤں پر کھڑا کرنے کے لیے ناگزیر ہیں۔ وزیر خزانہ نے مزید کہا کہ بینکنگ سیکاور مالیاتی اداروں کو چاہیے کہ وہ عام آدمی کے لیے آسان شرائط پر قرضوں کی فراہمی کو یقینی بنائیں تاکہ نچلی سطح پر معاشی سرگرمیوں کو فروغ مل سکے۔ اس موقع پر کمیٹی کے ارکان کو ہاؤسنگ فنانس اور توانائی کے شعبے میں جاری اصلاحات کے بارے میں بھی تفصیلی بریفنگ دی گئی۔ ماہرین کا ماننا ہے کہ ہاؤسنگ فنانس میں اس ہوشربا اضافے سے نہ صرف تعمیراتی صنعت سے وابستہ دسیوں ذیلی صنعتوں کو فائدہ پہنچے گا بلکہ ملک میں بے روزگاری میں کمی اور سستے گھروں کے خواب کی تکمیل میں بھی بڑی مدد ملے گی۔ حکومت کی ترجیح ہے کہ عام شہریوں کو مالیاتی نظام کے اندر لایا جائے تاکہ وہ بھی ملک کی معاشی ترقی میں بھرپور کردار ادا کر سکیں۔