لندن: بصارت سے محروم شخص کی شکایت پر لائم کی ای بائیکس ہٹا دی گئیں

برطانوی دارالحکومت لندن کے علاقے پینج میں ای بائیکس کی بے ترتیب پارکنگ کے خلاف سخت ایکشن لیتے ہوئے معروف کرایہ پر بائیکس دینے والی کمپنی 'لائم' نے اپنی تمام الیکٹرک بائیکس اس علاقے سے ہٹا دی ہیں۔ یہ اقدام ایک ایسے واقعے کے بعد اٹھایا گیا ہے جس میں بصارت سے محروم ایک مقامی رہائشی کو شدید مشکلات کا سامنا کرنا پڑا تھا۔ متاثرہ شہری نے شکایت کی تھی کہ فٹ پاتھوں پر بائیکس کے بے ہنگم ہجوم نے ان کا راستہ اس قدر مسدود کر دیا تھا کہ انہیں اپنی جان خطرے میں ڈال کر ایک مصروف سڑک پر چلنے پر مجبور ہونا پڑا۔ متاثرہ شخص جیسن بیل، جو کہ بصارت سے محروم ہیں، نے برطانوی میڈیا کو بتایا کہ وہ معمول کے مطابق باہر نکلے لیکن فٹ پاتھ پر جگہ جگہ کھڑی یا گری ہوئی ای بائیکس کی وجہ سے وہ آگے بڑھنے سے قاصر تھے۔ انہوں نے بتایا کہ فٹ پاتھ پر چلنا ناممکن ہو چکا تھا جس کی وجہ سے انہیں مجبوراََ ایک مصروف سڑک کا رخ کرنا پڑا جہاں سے تیز رفتار گاڑیاں گزر رہی تھیں۔ اس واقعے کے بعد معذور افراد کے حقوق کے لیے کام کرنے والی تنظیموں اور مقامی شہریوں کی جانب سے شدید ردعمل سامنے آیا اور عوامی سطح پر تحفظ کے خدشات کا اظہار کیا گیا۔ عوامی تنقید کے بعد کمپنی کے ذمہ داران نے صورتحال کا فوری نوٹس لیا اور متاثرہ شہری سے غیر مشروط معافی مانگی۔ لائم کے ترجمان کا کہنا تھا کہ کمپنی اپنے صارفین اور عام شہریوں کی حفاظت اور سہولت کو اولین ترجیح دیتی ہے، اور اس طرح کے واقعات ناقابل قبول ہیں۔ احتیاطی تدابیر کے طور پر پینج کے علاقے سے تمام ای بائیکس کو وقتی طور پر ہٹا دیا گیا ہے تاکہ یہ یقینی بنایا جا سکے کہ آئندہ پیدل چلنے والوں بالخصوص معذور افراد کو کسی قسم کی دشواری کا سامنا نہ کرنا پڑے۔ ماہرین کا کہنا ہے کہ شہروں میں مائیکرو موبلٹی اور ای بائیکس کا رجحان تیزی سے بڑھ رہا ہے لیکن اس کے ساتھ ساتھ فٹ پاتھوں کی بحالی اور درست پارکنگ کے قوانین پر سختی سے عمل درآمد کرانا بھی انتظامیہ اور متعلقہ کمپنیوں کی ذمہ داری ہے۔ اس واقعے نے ایک بار پھر اس بات اجاگر کیا ہے کہ پبلک اسپیسز کو تمام شہریوں خصوصاََ معذور اور بزرگ افراد کے لیے محفوظ اور قابل رسائی بنانا کتنا ضروری ہے۔