عید میلاد النبی 2026: پیغامات، مبارکباد اور خصوصی تقریبات

پاکستان بھر میں رحمت للعالمین حضرت محمد مصطفی صلی اللہ علیہ وآلہ وسلم کا یوم ولادت باسسعادت یعنی عید میلاد النبی انتہائی مذہبی عقیدت، احترام اور تزک و احتشام کے ساتھ منایا جا رہا ہے۔ دن کا آغاز مساجد میں خصوصی دعاؤں اور ملکی سلامتی و بقا کے لیے فجر کے وقت مانگی جانے والی دعاؤں سے ہوا۔ اس مبارک موقع پر ملک کے چھوٹے بڑے شہروں میں جلوس نکالے جا رہے ہیں اور چراغاں کیا گیا ہے جبکہ خصوصی محفل نعت اور سیرت النبی کانفرنسز کا انعقاد بھی کیا جا رہا ہے جن میں فرزندان توحید جوش و خروش سے شرکت کر رہے ہیں۔ اس پُرمسرت موقع پر صدر مملکت آصف علی زرداری اور وزیراعظم شہباز شریف نے پوری قوم اور عالم اسلام کو مبارکباد پیش کی ہے۔ اپنے الگ الگ پیغامات میں صدر اور وزیراعظم کا کہنا تھا کہ عید میلاد النبی کا دن ہمیں درس دیتا ہے کہ ہم اپنی زندگیاں حضور اکرم صلی اللہ علیہ وآلہ وسلم کی سیرت طیبہ اور تعلیمات کے مطابق ڈھالیں۔ انہوں نے اس بات پر زور دیا کہ موجودہ ملکی اور عالمی حالات میں امن، بھائی چارہ، رواداری اور انصاف کے نبوی اصولوں کو اپنانا ہی تمام مسائل کا واحد حل ہے۔ بلوچستان کے وزیر اعلیٰ اور دیگر صوبائی وزراء نے بھی اپنے پیغامات میں کہا ہے کہ خاتم النبیین حضرت محمد صلی اللہ علیہ وآلہ وسلم کی دنیا میں آمد پوری انسانیت کے لیے ایک عظیم رحمت اور نجات کا ذریعہ ہے۔ انہوں نے عوام سے اپیل کی کہ وہ اس بابکت دن پر غریبوں، ناداروں اور بیماروں کی خصوصی مدد کریں اور اسلامی تعلیمات کے مطابق ایک فلاحی معاشرے کی تشکیل کے لیے اپنا بھرپور کردار ادا کریں۔ ملک بھر میں سیکورٹی کے بھی انتہائی سخت انتظامات کیے گئے ہیں تاکہ تمام جلوس اور تقریبات پرامن طریقے سے اختتام پذیر ہوں۔