بل گیٹس کی مصنوعی ذہانت کے خطرات پر عالمی خبردار

مائیکروسافٹ کے شریک بانی اور ٹیکنالوجی کے معروف ماہر بل گیٹس نے مصنوعی ذہانت یعنی اے آئی کے بڑھتے ہوئے نفوذ اور ممکنہ خطرات کے پیش نظر ایک اہم مطالبہ سامنے رکھا ہے۔ ان کا کہنا ہے کہ دنیا اس وقت مصنوعی ذہانت کے باعث آنے والے معاشی و معاشرت انقلاب کے لیے خطرناک حد تک غیر تیار ہے اور اگر بروقت اقدامات نہ کیے گئے تو عالمی لیبر مارکیٹ کو شدید دھچکا لگ سکتا ہے۔ بل گیٹس کے مطابق، اس بات کی اشد ضرورت ہے کہ ملازمتوں کے کچھ ایسے زمرے یا شعبے متعین کیے جائیں جو صرف اور صرف انسانوں کے لیے مخصوص ہوں تاکہ ٹیکنالوجی کے اس طوفان میں کارکنوں کے حقوق اور روزگار کا تحفظ یقینی بنایا جا سکے۔ عالمی میڈیا رپورٹس کے مطابق بل گیٹس کا یہ مؤقف ایسے وقت میں سامنے آیا ہے جب دنیا بھر میں مصنوعی ذہانت کے تیزی سے فروغ پاتے ہوئے نظام روزگار کے روایتی ڈھانچے کو تیزی سے متاثر کر رہے ہیں۔ ناقدین اور ماہرین بھی اس بات پر متفق ہیں کہ چیٹ جی پی ٹی اور دیگر جنریٹو اے آئی سسٹمز نے روایتی نوکریوں کے لیے خطرے کی گھنٹی بجا دی ہے۔ بل گیٹس کا خیال ہے کہ بڑی ٹیکنالوجی کمپنیاں اے آئی کے خطرات کو اس طرح تسلیم نہیں کر رہیں جس طرح انہیں کرنا چاہیے، اور اس معاملے میں پالیسی سازوں کو سنجیدگی کا مظاہرہ کرنا ہوگا۔ مزید برآں، بل گیٹس نے اس بات کا بھی عندیہ دیا ہے کہ وہ اس سنگین عالمی چیلنج پر بین الاقوامی سطح پر تعاون کے خواہاں ہیں اور اس حوالے سے وہ چین کے صدر شی جن پنگ سمیت دیگر عالمی رہنماؤں کے ساتھ بھی پالیسی مکالمے اور خیالات کے تبادلے کے خواہشمند ہیں۔ ان کا مقصد ایک ایسا مشترکہ لائحہ عمل تیار کرنا ہے جو انسانی مہارت کو ترجیح دے اور ٹیکنالوجی کے منفی اثرات کو کم کرنے میں مددگار ثابت ہو۔