برطانیہ میں طوفانی بارشوں اور سیلاب کی نئی وارننگ جاری

برطانیہ میں موسم کی صورتحال ایک بار پھر ابتر ہونے کا خدشہ ظاہر کیا گیا ہے جہاں محکمہ موسمیات (میٹ آفس) نے جمعرات کے روز کے لیے ملک کے مختلف حصوں میں طوفانی بارشوں کی نئی اور سخت وارننگ جاری کی ہے۔ یہ انتباہ ایسے وقت میں سامنے آیا ہے جب ملک بھر میں غیر یقینی اور بارشوں کا سلسلہ مسلسل جاری ہے اور نشیبی علاقے پہلے ہی پانی میں ڈوبے ہوئے ہیں۔ حکام کے مطابق اس تازہ طوفانی سسٹم کے تحت انگلینڈ اور ویلز کے کئی علاقوں میں شدید بارش کی توقع کی جا رہی ہے۔ محکمہ موسمیات کی جانب سے جاری کردہ الرٹ میں یہ بھی واضح کیا گیا ہے کہ ان طوفانی بارشوں کی وجہ سے متعلقہ علاقوں میں فلیش فلڈنگ یعنی اچانک سیلاب کا خطرہ بھی موجود ہے۔ اس صورتحال میں شہری علاقوں کے علاوہ ٹرانسپورٹ کے نظام شدید متاثر ہونے کا خدشہ ہے کیونکہ سڑکوں پر پانی جمع ہونے سے ٹریفک کی روانی بری طرح متاثر ہو سکتی ہے۔ ماہرینِ موسمیات کا کہنا ہے کہ حالیہ ہفتوں کے دوران موسم کا یہ غیر مستحکم رویہ بحر اوقیانوس سے آنے والے کم دباؤ کے سسٹمز کی وجہ سے ہے جو مسلسل برطانوی جزائر کو اپنی لپیٹ میں لے رہے ہیں۔ اس صورتحال کے پیش نظر متعلقہ اداروں، ایمرجنسی سروسز اور مقامی کونسلز کو ہائی الرٹ پر رکھا گیا ہے تاکہ کسی بھی ہنگامی صورتحال یا سیلابی ریلے سے نمٹنے کے لیے فوری اقدامات کیے جا سکیں۔ شہریوں کو ہدایت کی گئی ہے کہ وہ غیر ضروری سفر سے گریز کریں اور محکمہ موسمیات کی جانب سے جاری ہونے والی تازہ ترین اپڈیٹس پر گہری نظر رکھیں تاکہ ممکنہ خطرات سے محفوظ رہ سکیں۔ حکومت اور مقامی انتظامیہ کی جانب سے عوام سے اپیل کی گئی ہے کہ وہ حفاظتی تدابیر اختیار کریں، خاص طور پر ننشبی اور دریاؤں کے قریب رہنے والے افراد کو محفوظ مقامات پر منتقل ہونے یا الرٹ رہنے کے لیے کہا گیا ہے تاکہ جانی و مالی نقصان سے بچا جا سکے۔