پاکستان کویت دفاعی تعلقات اور علاقائی سلامتی پر اہم پیشرفت

اسلام آباد: پاکستان اور کویت نے دوطرفہ تعلقات کو نئی بلندیوں تک لے جانے اور دفاعی شعبے میں باہمی تعاون کو مزید فروغ دینے کا پختہ عزم ظاہر کیا ہے۔ یہ پیشرفت کویت کے ایک اعلیٰ سطح کے دفاعی وفد کے دورہ پاکستان کے دوران سامنے آئی، جہاں انہوں نے پاکستانی عسکری اور سول قیادت کے ساتھ اہم ملاقاتیں کیں۔ آئی ایس پی آر کے مطابق کویتی دفاعی حکام نے چیف آف ڈیفنس فورسز جنرل سید عاصم منیر سے ملاقات کی جس میں باہمی دلچسپی کے امور، خطے کی موجودہ سکیورٹی صورتحال اور دفاعی اشتراک کو وسعت دینے کے امکانات پر تفصیلی غور کیا گیا۔ ملاقات کے دوران دونوں برادر ملکوں کے درمیان عسکری شعبے میں تربیت، تکنیکی مدد اور مشترکہ مشقوں کو بڑھانے پر بھی اتفاق کیا گیا۔ دوسری جانب کویتی وفد نے وزیر خارجہ و نائب وزیراعظم اسحاق ڈار سے بھی ملاقات کی، جس میں دوطرفہ تعلقات کی موجودہ نوعیت پر اطمینان کا اظہار کیا گیا اور تجارتی و اقتصادی روابط کو مزید مضبوط بنانے کے عزم کا اعادہ کیا گیا۔ رہنمائوں کا کہنا تھا کہ پاکستان اور کویت کے مابین تاریخی برادرانہ تعلقات ہیں جو وقت گزرنے کے ساتھ ساتھ مزید گہرے ہوتے جا رہے ہیں۔ دونوں ممالک کی قیادت کا یہ ماننا ہے کہ خطے میں پائیدار امن و استحکام کے لیے قریبی رابطہ کاری اور باہمی تعاون ناگزیر ہے۔ اس دورے کو پاک کویت تعلقات میں ایک سنگ میل قرار دیا جا رہا ہے جس سے مستقبل میں دفاعی اور اقتصادی میدان میں تعاون کے نئے دروازے کھلیں گے۔