اسحاق ڈار اور برطانوی سیکرٹری خارجہ کی ملاقات میں اہم امور پر گفتگو

نائب وزیراعظم اور وزیر خارجہ اسحاق ڈار نے اپنے دورہ برطانیہ کے دوران برطانوی سیکرٹری خارجہ سے اہم ملاقات کی ہے۔ وزارتِ خارجہ کے مطابق ملاقات میں دوطرفہ تعلقات کو مزید مستحکم کرنے کے علاوہ سندھ طاس معاہدے اور خطے کی مجموعی سلامتی کی صورتحال پر تفصیلی تبادلہ خیال کیا گیا۔ دونوں رہنماؤں نے اس عزم کا اعادہ کیا کہ پاک برطانیہ شراکت داری کو تمام شعبوں بالخصوص معیشت، تجارت اور سلامتی کے شعبوں میں مزید وسعت دی جائے گی۔ ملاقات کے دوران برطانوی قانون سازوں نے خطے میں امن کے لیے پاکستان کے قائدانہ کردار اور مشرق وسطیٰ میں ثالثی کی کوششوں کی بھی پرزور تحسین کی۔ اس موقع پر دونوں ممالک کے درمیان انسدادِ دہشت گردی کے شعبے میں تعاون کو مزید بڑھانے پر بھی اتفاق کیا گیا تاکہ خطے سے اس ناسور کا خاتمہ کیا جا سکے۔ علاوہ ازیں، اسحاق ڈار نے لندن میں کامن ویلتھ کے سیکرٹری جنرل سے بھی ملاقات کی جس میں باہمی دلچسپی کے امور پر بات چیت کی گئی۔ اس کے علاوہ پاکستان کی جانب سے صومالی قزاقوں کے قبضے میں پھنسے ہوئے پاکستانی ملاحوں کی فوری رہائی کے لیے عالمی سمندری تنظیم (IMO) سے مداخلت کا بھی پرزور مطالبہ کیا گیا۔