وزارت اطلاعات کا بانی پی ٹی آئی کی قید پر غیر ملکی میڈیا رپورٹس پر ردعمل

وفاقی وزارتِ اطلاعات و نشریات نے اتوار کے روز غیر ملکی میڈیا آؤٹ لیٹس کی جانب سے زیرِ حراست سیاسی رہنما سے متعلق پھیلائی جانے والی گمراہ کن کہانیوں کو یکسر مسترد کر دیا ہے۔ ترجمان وزارتِ اطلاعات کا کہنا ہے کہ بانی پی ٹی آئی کو کوئی بھی غیر آئینی یا ایگزیکٹو حراست میں نہیں رکھا گیا بلکہ وہ عدالتی کارروائی کے بعد متعدد سزاؤں کے تحت قانون کے مطابق جیل میں قید ہیں۔ انہوں نے واضح کیا کہ قانون کے دائرہ کار میں رہتے ہوئے انہیں تمام قانونی چارہ جوئی کا حق حاصل ہے اور ان کی قید کے تمام امور پاکستان کے جیل قوانین اور عدالتی احکامات کے عین مطابق چلائے جا رہے ہیں۔ وزارت کی طرف سے جاری کردہ بیان میں ان الزامات کو بھی بے بنیاد قرار دیا گیا جن میں کہا گیا تھا کہ قیدی کو تنہائی، سزاؤں یا کسی قسم کی محرومی کا سامنا ہے۔ حکومت کا مؤقف ہے کہ بانی پی ٹی آئی کو جیل میں تمام بنیادی سہولیات میسر ہیں جن میں خصوصی احاطہ، ورزش کا سامان، کتب، اور گھر کا کھانا شامل ہیں۔ علاوہ ازیں، خاندانی افراد اور پارٹی رہنماؤں کی ملاقاتوں کے حوالے سے اعداد و شمار پیش کرتے ہوئے بتایا گیا کہ ان کی اہلیہ سمیت دیگر رشتہ داروں، وکلاء اور ڈاکٹروں کی باقاعدگی سے ملاقاتیں کرائی جارہی ہیں اور جیل ریکارڈ اس بات کی گواہی دیتا ہے کہ اب تک سینکڑوں زائرین نے ملاقاتیں کی ہیں۔ طبی سہولیات کے معاملے پر بات کرتے ہوئے وزارتِ اطلاعات نے واضح کیا کہ سپریم کورٹ کے احکامات کی روشنی میں قیدی کو بہترین طبی امداد فراہم کی گئی ہے اور نامور طبی ماہرین کے بورڈز نے ان کا معائنہ کیا ہے۔ اسپتال منتقلی کے معاملے پر وضاحت دیتے ہوئے بتایا گیا کہ پمز اسپتال میں ماہر ڈاکٹروں نے ان کا مکمل طبی معائنہ کیا اور آنکھ کے علاج کے لیے کامیاب طریقہ کار اپنایا گیا۔ وزارت نے مزید کہا کہ طبی معائنے کے بعد ان کی صحت تسلی بخش اور مستحکم پائی گئی ہے لہٰذا اس حساس معاملے پر غیر ضروری سیاسی رنگ دینا اور اسے مہم جوئی کے طور پر استعمال کرنا درست نہیں۔ حکومت نے اس بات پر زور دیا کہ کسی بھی قیدی کی صحت کو سیاست کی نذر نہیں کیا جانا چاہیے اور تمام اقدامات قانون اور ضابطے کے تحت اٹھائے جا رہے ہیں۔