آرمی چیف کا دورہ پی او ایف واہ، دفاعی پیداوار کا جائزہ

چیফ آف ڈیفنس فورسز اور آرمی چیف فیلڈ مارشل سید عاصم منیر نے پاکستان آرڈیننس فیکٹری (پی او ایف) واہ کا اہم دورہ کیا۔ اس موقع پر انہوں نے ملکی دفاعی پیداوار، جدید اسلحے کی تیاری اور عسکری خود انحصاری کے لیے اٹھائے جانے والے اقدامات کا تفصیلی جائزہ لیا۔ آئی ایس پی آر کے مطابق آرمی چیف کو فیکٹری کی انتظامیہ اور متعلقہ حکام کی جانب سے پی او ایف کے آپریشنز، جاری منصوبوں اور مستقبل کی حکمت عملی پر جامع بریفنگ دی گئی۔ دورے کے دوران فیلڈ مارشل سید عاصم منیر نے فیکٹری کے مختلف حصوں کا معائنہ کیا اور تیار کردہ جدید ہتھیاروں کا بھی باریک بینی سے جائزہ لیا۔ انہوں نے معیار کو بین الاقوامی سطح پر برقرار رکھنے اور پیداواری صلاحیت کو مزید بڑھانے کے لیے جدید ٹیکنالوجی کے استعمال پر زور دیا۔ آرمی چیف نے اس بات پر بھی روشنی ڈالی کہ ملکی دفاع کو ناقابل تسخیر بنانے کے لیے مقامی سطح پر سازوسامان کی تیاری وقت کی اہم ضرورت ہے۔ انہوں نے اس عزم کا اظہار کیا کہ پاکستان اپنی دفاعی ضروریات کو پورا کرنے کے لیے ہر ممکنہ وسائل بروئے کار لا رہا ہے تاکہ ملک کی سلامتی پر کسی قسم کا سمجھوتہ نہ کرناپڑے اور قومی مفادات کا بھرپور تحفظ کیا جا سکے۔ دورے کے دوران ملازمین اور انجینئرز کی پیشہ ورانہ صلاحیتوں کو بھی سراہا گیا جنہوں نے مشکل حالات میں بھی ملکی دفاعی صنعت کو مضبوط کرنے میں اہم کردار ادا کیا۔