آزاد کشمیر بدامنی اور طاقت کا استعمال: HRCP کی نئی رپورٹ جاری

لاہور: ہیومن رائٹس کمیشن آف پاکستان (ایچ آر سی پی) نے اپنی تازہ ترین فیکٹ فائنڈنگ رپورٹ میں انکشاف کیا ہے کہ آزاد جموں و کشمیر میں حالیہ بدامنی کی بنیادی وجوہات دیرینہ سیاسی اور سماجی و اقتصادی شکایات، ادارہ جاتی عدم اعتماد اور گورننس کے نقائص تھے۔ کمیشن کے مطابق، ریاست کی طرف سے بڑھتا ہوا جارحانہ ردعمل اور طاقت کا غیر متناسب استعمال معاشرے میں مزید پولرائزیشن اور عوامی اعتماد کو مجروح کرنے کا باعث بنا۔ 'سول اسپیسز انڈر اسٹرین اِن آزاد جموں و کشمیر' کے نام سے جاری اس رپورٹ میں واضح کیا گیا ہے کہ جموں و کشمیر جوائنٹ عوامی ایکشن کمیٹی (جے اے اے سی) کے ساتھ 2025 کے معاہدے پر عمل درآمد کا تنازعہ اور پاکستان میں مہاجرین کی 12 مخصوص نشستوں پر پیدا ہونے والی بحث اس سیاسی محاذ آرائی کا محور بن گئی۔ رپورٹ کے مطابق حکومت اور ایکشن کمیٹی کے درمیان مذاکرات ناکام ہونے کے بعد حکومت نے 5 جون کو اے جے کے انسداد دہشت گردی ایکٹ 2014 کے تحت تنظیم کو کالعدم قرار دے دیا اور نقل و حرکت نیز مواصلاتی رابطوں بالخصوص موبائل انٹرنیٹ کی طویل معطلی جیسے سخت اقدامات اٹھائے۔ اس تمام صورتحال کے دوران ہونے والے الیکشن کے عمل پر بھی گہرے اثرات مرتب ہوئے اور سیکیورٹی خدشات کے پیش نظر انتخابات کو مراحل میں منعقد کرنا پڑا۔ ایچ آر سی پی کے مشن نے، جس نے 8 سے 10 اگست تک فیکٹ فائنڈنگ اور انتخابی مشاہدہ کیا، بتایا کہ انہیں تشدد کے پیمانے، جے اے اے سی کے طریقوں اور سیکیورٹی فورسز کے طرزِ عمل کے بارے میں انتہائی متضاد بیانات موصول ہوئے۔ تاہم سیاسی اور سماجی اسٹیک ہولڈرز میں اس بات پر وسیع اتفاق پایا گیا کہ بنیادی تنازعہ کو زبردستی کے بجائے سیاسی بات چیت کے ذریعے حل کیا جانا چاہئیے تھا۔ کمیشن نے احتجاج کے دوران ہونے والی اموات اور زخمیوں کے حوالے سے طاقت کے مبینہ حد سے زیادہ استعمال پر گہری تشویش کا اظہار کیا ہے۔ رپورٹ میں بتایا گیا کہ پولیس چیف کے مطابق جون سے اب تک سیکیورٹی فورسز کے متعدد اہلکار جاں بحق اور زخمی ہوئے ہیں، جبکہ ایچ آر سی پی کو متاثرہ خاندانوں کی طرف سے بھی ایسے بیانات ملے جن میں سیکیورٹی فورسز کے ہاتھوں مظاہرین کی ہلاکت یا شدید زخمی ہونے کا دعویٰ کیا گیا۔ کمیشن نے راولاکوٹ تک رسائی نہ ہونے کے باعث شہریوں کے جانی نقصان کے مکمل تخمینے سے معذوری ظاہر کی اور تمام اموات و زخمی ہونے کے واقعات کی ایک آزاد اور غیر جانبدارانہ تحقیقات کا مطالبہ کیا تاکہ یہ معلوم ہو سکے کہ طاقت کا استعمال قانون کے مطابق اور ضروری حد تک تھا یا نہیں۔ رپورٹ میں سیاسی کارکنوں اور صحافیوں کو انسداد دہشت گردی اور حفاظتی حراست کے قوانین کے تحت نشانہ بنانے پر بھی کڑی تنقید کی گئی ہے۔ ایچ آر سی پی نے مطالبہ کیا ہے کہ تمام گرفتار افراد کو منصفانہ ٹرائل کا حق دیا جائے، ان کے مقدمات کا آزادانہ جائزہ لیا جائے اور پرامن سیاسی سرگرمیوں یا اجتماعات میں ملوث ہونے کی بنیاد پر گرفتار کیے گئے تمام افراد کو رہا کیا جائے۔