لاہور میں بیوی سے زیادتی پر شوہر کو 10 سال قید کی سزا

لاہور کی ایک خصوصی اینٹی ریپ عدالت نے بیوی کو شدید جنسی تشدد کا نشانہ بنانے اور زیادتی کے جرم میں ایک شخص کو 10 سال قید کی سزا سنا دی ہے۔ ایڈیشنل ڈسٹرکٹ اینڈ سیشن جج اور اسپیشل کورٹ اینٹی ریپ کے جج ظفر یاب چھڈھڑ کی جانب سے جاری کردہ حکم نامے کے مطابق مجرم محمد فاروق پر الزام ثابت ہونے کے بعد یہ فیصلہ سنایا گیا ہے۔ مقدمے کا اندراج تھانہ کاہنہ میں تعزیرات پاکستان کی دفعہ 376 کے تحت کیا گیا تھا جس میں متاثرہ خاتون کے والد نے مدعی کا کردار ادا کیا۔ پولیس ریکارڈ کے مطابق ملزم محمد فاروق نے اپنی اہلیہ کو مسلسل سنگین جسمانی اور جنسی تشدد کا نشانہ بنایا جس کے نتیجے میں اسے اندرونی طور پر شدید چوٹیں آئیں اور فوری طور پر ایمرجنسی سرجری کروانا پڑی۔ ابتدائی طور پر اس مقدمے میں تعزیرات پاکستان کی دفعات 376 اور 377 شامل کی گئی تھیں، تاہم تفتیش کے دوران مزید شواہد سامنے آنے پر دفعہ 377 کو خارج کر دیا گیا اور مقدمہ صرف دفعہ 376 کے تحت چلایا گیا۔ عدالت نے تمام شواہد اور گواہوں کا جائزہ لینے کے بعد مجرم کو 10 سال قید بامشقت اور 50 ہزار روپے جرمانے کی سزا سنائی۔ عدالت کے فیصلے کے مطابق جرمانہ ادا نہ کرنے کی صورت میں مجرم کو مزید چھ ماہ قید کا سامنا کرنا ہوگا۔ اس کے علاوہ ضابطہ فوجداری کی دفعہ 544-اے کے تحت متاثرہ خاتون کو تین لاکھ روپے ہرجانہ ادا کرنے کا بھی حکم دیا گیا ہے۔ عدالت کی جانب سے جاری کردہ وارنٹ کے بعد سپرنٹنڈنٹ سنٹرل جیل کوٹ لکھپت کو ہدایت کی گئی ہے کہ وہ مجرم کو اپنی تحویل میں لے کر قانون کے مطابق سزا پر عمل درآمد کو یقینی بنائیں۔